Heat aia sa zawk LeBron James

Los Angeles Lakers forward LeBron James chuan Miami Heat lakah point 51 ngawt score chungin a team hi 113-97 in hnehna a chanpui a, NBA regular season kal laiah a vawi kua nan hnehna an chang.

Nimin zing NBA regular season inkhelah Los Angeles lamin bul an ṭan fuh a, chawlhlawk an hman laiin point 16-in hma an hruai fal. Lakers tan James chetṭhat bakah Kentavious Caldwell-Pope chuan point 19 a nei thei a, an khingpui Heat tan tawhchhuah theihna hun ṭha an siamsak lo.

Inkhel dangah NBA champion lai Golden State Warriors chu San Antonio Spurs lakah 104-92 in an tlawm. Spurs player panga ten point 10 chuang an score thei a, an zingah point 24 nei theitu LaMarcus Aldridge a langsar fal - ani hian rebound vawi 18 ngawt a la thei bawk a ni.

Tun hnaiah Golden State hian beisei an phak lo a, an match hnuhnung pathumah an tlawm - player pawimawh Stephen Curry awm loh an tuar tih a chiang. Curry hi a khel bawr na vangin a inlan thei lo tawh a, Spurs lakah hian Draymond Green pawh ke zungṭang na vangin a inlan thei lo bawk.

GSW hian Ningani zing dar 9:00-ah Oklahama City Thunder an hmachhawn leh dawn a, James awmna Lakers hian zing dar 6:30 hian Cleveland Cavaliers an hmachhawn dawn bawk - James-a'n a ropui tawhna hmun Quicken Loans Arena a tlawh.