Syed Modi-ah Sindhu inlan dawn lo

Syed Modi interna­tional World Tour Super 300 tournament-ah cham­pion lai PV Sindhu chuan a inlan loh tur thu a sawi a, tun hnaia chawlh lak a duh chhan hi thla leha khelh tur BWF World Tour Final atan inbuatsaihna ṭha lehzual neih a duh vang a ni.

Kum 23 mi Sindhu hi tun dinhmunah world number 5 a ni mek a, China khawpuia neih turah hian a tling tawh. A thiam zual inelna tura an buatsaih Tour Final hi a ngai pawimawh hle a ni.

Rio Olympic silver medalist Sindhu-i pa P.V. Ramana chuan, "Sin­dhu hian Badminton Association of India (BAI) hnenah Syed Modi tour­nament khel lo turin dilna a thlen a, December thla atan inbuatsaihna a nei zawk dawn a ni," tiin a sawi.

Kuminah Sindhu hian nomawi lian tham a chawi hleithei lo, player ṭha zual pariat inelnaah hian a inlan a nih chuan tun season chhunga tournament 18 a khelhna tur chiah a ni dawn a, he inlena bikah hian ṭum thum a inlanna tur chiah a ni bawk. Season hmasa khan final lut mah se Japanese nula Akane Yamaguchi a ngam lo.