Switzerland-in ropui takin Belgium lehthal

UEFA Nations League-a ngaihnawm zel - Switzerland chuan Pathianni zan khan Bel­gium lakah thil 'mak' an lantir a, si hnih an phurh hnuah 5-2 a hnehna changin semifinal an lut.

Switzerland-a inkhelah minute 17 a nih chuan Belgium-in goal hnih an khung fel der tawh a, Switzerland-in semi­final lut tura goal khung an mamawh zat chu goal li a ni.

Rin loh takin Switzerland an 'comeback' a, an chak satliah a ni mai lo a, an mamawh zat aia tam goal nga an khung - Haris Seferovic chuan hattrick siamin UEFA Nations League-a a sang pali zingah Swiss team a vawrhkai.

Nakkum June-a khelh tur UEFA Nations League semi­final atan Switzerland bakah England chu tling chiang tawh an ni a, nizana inkhel France leh Netherlands-a team pakhat zawk hian an zawm ve leh dawn - he thuziak i chhiar meuh chuan a sang pali hi a chiang tawh ang.

Chungnung hmasa Belgium

Switzerland khelmualah Belgium an chungnung hmasa zawk a, minute hnihna lekah Thorgan Hazard chuan goal hmahruai a khung - mahni muala khel Switzerland an insiamṭha hman lo.

Minute 17-na a ni a, Swit­zer­land an insiamṭha hman lo - Hazard bawkin Belgium tan goal a khung a, 2-0 a ni. Tun ṭuma Belgium tana langsar Hazard hi Chelsea 'Hazard' Eden ni loin a unaupa Thorgan zawk a ni.

Chelsea-a a unaupa Eden Hazard ang thoa season duh­awm tak hmang mek Thorgan hian a unaupa Eden-a ball kal zel aṭanga Nico Elvedi tihsual hmang ṭangkaiin goal hmahruai hi a khung a, goal kil sirah an goal hnihna a khung zui.

Kum 25 mi Thorgan hi Bo­ru­ssia Mönchengladbach tan a khel mek a, German club tan hian season duhawm tak hmang mekin match 12-ah goal 10 a khung a, assist vawi li a nei tawh - a goal hmasa zawk a khung nana chesual Elvedi hi Gladbach-a a khelhpui a ni.

Beisei a bo

Lucerne khawpuia inkhelah Belgium-in goal an khung hma avangin Switzerland fans beisei a chuai hma a, minute 17-naa an hmuh chu Nations League semifinal khel lo tur Switzerland an ni.

Switzerland hian hnehna chang pawh ni se Belgium nen an point hmuh zat a in ang dawn a, an lo intawn tawhnaa goal difference chu en tur a ni - hemi a nih avang hian Swiss team hian tlang tur chuan goal li tal an khung a ngai!

Belgium khelh dan leh Switzerland-in goal an ma­mawh zat thlirin thil thleng thei lo ang deuhthaw a ni a, si hnih phurh hnua goal li khung a, goal chhuah tawh loh chu thil harsa a ni.

Switzerland fans zingah stadium chhuahsan an awm a nih pawhin a awm lo hran lo a, world number 1 laka comeback nan chuan an hmaa inchhawp hi a 'ko' hret.

Mahse maw...

Switzerland player-ten an beiseina an hloh duh lo a, huaisen takin an 'fight' let. Minute 26-na a ni a, chu chu comeback ropui inṭanna a ni. Nacer Chadli chuan Kevin Mbabu a ti tlu a, penalty a chawi.

Ricardo Rodriguez a rawn pen chhuak a, Milan defender hian FIFA best goalkeeper nilai Thibaut Courtois rin lohna lamah a pet lut a, Swiss team an phur thar sauh.

Haris Seferovic hun a thleng a, Benfica striker hi a hawikir leh tawh lo. Khel ṭha em em mai Liverpool attacking midfielder Xherdan Shaqiri chuan minute 31-naah Seferovic tan cross a nei a, kum 26 mi striker hian hnai set sawt aṭangin a pet goal.

Switzerland-in goal hnih an chhuah aṭanga minute14-naah an si phurh an sut zo a, an phur sawt - goal hnih dang khung belh chuan a sang pali zingah an tel thei tih an hria a, Belgium an talbuai thung.

A hming chu Seferovic

Chawlhlawk hman nan minute khat chiah a awm tawh a, Seferovic bawk a inlar nawn. Kum 2009-a FIFA U17 World Cup-a Swiss team a champion pui avanga striker beiseiawm tia an sawi ṭhin hian an goal thumna a khung.

Chawlhlawk hman zui a ni a, inkhel ṭantir nen boruak a in ang lo hle. Goal hmasa ber an chhuah nana chesual Elvedi chuan a tihsual thup turin Shaqiri ball siamsak a khung a, 4-2 a nih avangin Switzerland chu last four lut tur an ni.

Swiss team-in an duhtawk lo. Seferovic bawkin minute 62-naah goal khung lehin hattrick a siam a, Benfica tana tun season-a goal li chiah la khungtu hian ram tan match khatah goal thum a khung der!

Belgium-in Eden Hazard hmangin hun tawp hnaih lamah chance nei ve leh mah se an chhawr lo a, Switzerland an tlang.