Noida-ah Malsawmdawngliana a tlan chak

November 16-18 chhung khan 21st JK Tyre FMSCI National Racing Championship chu Buddh International Circuit, Greater Noida-ah neih a ni a, Mizo rider Malsawmdawngliana (Lalmama) a che ṭha hle.

National Championship-ah hian Gixxer Cup bikah Malsawmdawngliana hi a pumpuiah pahnihna a ni a, lawmman a tan Suzuki Gixxer Naked a dawng. Inelna hi kum tir lam khan Kari Motor Speedway, Coimbarote-ah round hmasa lam neih tawh niin, round tinah intlansiak pahnih zel a awm.

Final round bikah hian Mizo rider hi intlanisak hmasa zawkah chesualin 13-na a ni hram a, Mizoram aṭanga kal pakhat zawk Anthony Lalawmpuia chu pahnihna a ni thung. Race 2-ah Lalmama hian 13-na aṭangin bulṭan mah se ṭha taka tlanin pakhatna dinhmun a luah a, round hmasa lama a chet ṭhat tawhna nen belhkhawmin a pumpuiah pahnihna a ni - a chungah Joseph Mathew chiah a awm; Anthony hi palina a ni thung.

Gixxer Cup bakah hian Asia Cup of Road Racing (ACRR) tlan nghal niin, Malsawmdawngliana hi Race 1-ah tluin palina a ni a, intlansiak thawhhnihnaah erawh Japanese leh Sri Lanka rider tlan pelin hnehna a chang.

Mizoram Motorsports Association president Vanlalmuana chuan, "Mizo ṭhalai ten Motorcycle Racing huangah theihna sang tak kan nei a, 2017 leh 2018-ah Redbull Rookies Cup champion kan nei thei. Tuna kan thlen chin hi a lawmawm a, chutih rualin hmunhma ṭha zawk chu nei ni ila chuan hei aia sang zawk hi kan la thleng thei ang," tiin Vanglaini a hrilh.