Nations League-ah England an vul

UEFA-in Europe ram tana inelna a buatsaih thar Nations League-ah England chuan FIFA World Cup semfinal-a an hneh loh Croatia chu 2-1 a hnehin final round an lut a, 1966 hnua ram inelna lian thama la champion leh lo Three Lions-in nomawi an beisei leh thei ta.

Pathianni zan Wembley Stadium inkhelah mikhual Croatia-in Andrej Kramaric hmangin minute 57-naah hma an hruai a, England-in substitute Jesse Lingard leh captain Harry Kane hmangin an lehthal a, relegate thei dinhmuna ding hman Gareth Southgate-a hote League A4 hmahruaitu niin semifinal an lut.

Semifinal nge Relegate?

UEFA Nations League-ah hian chhawng li a awmin League A-D aṭangin league sang ber chiahin final round an lut thei a, team pali tan chiah hmunruak a awm avangin semifinal tiin an sawi theih bawk.

England hi League A-ah tel phain group 4-ah Spain leh Croatia nen an awm. La Roja-in an match hnuhnung berah kumin World Cup finalist an hneh loh avangin final round luh theihna hun ṭha an bawlhpelh a, England leh Croatia inkhela chak zawk tan semifinal kawng a inhawng.

Chutihrualin goal awm loa an inhnehtawk chuan Croatia hi relegate tur an ni a, goal awma an inhnehtawk erawh chuan England an relegate dawn thung a, thil thleng thei a tam avangin inkhelh ṭan hma hauhin boruak a nung.

Rakitic-a tel lohna

Croatia-in World Cup-a player pawimawh Ivan Rakitic chu hliam vangin an chhawr thei lo a, chutihrualin starting eleven-a inlan player-te chu Spain an hneh ṭuma tha thawh vek an ni thung.

England erawhin match hnuhnung berah friendly match khel thungin United States chu 3-0 in an sawp a, Gareth Southgate-a'n tha thar ngai pawimawhin inkhel bul ṭan tura dah luh player paruk chu an match hnuhnung berah hian an inlan lo hrim hrim a, tha thar nen an inlan.

Three Lions tana bul ṭantute zingah Fabian Delph a upa ber a, Kyle Walker nen kum 28 mi chauh niin hemite hnuaiah hian kum 26 tling hnai Jesse Lingard awmin player naupang ber Jadon Sancho chu kum 18 mi lek a ni.

Croatia an che hmasa

England-in bul an ṭan chhe lo a, Kane-a'n chance ṭha a hlah a, Raheem Sterling-a'n a hmawr a bawk thei lo a, Marcus Rashford pawhin chak takin ball la lut thei mah se a finishing a tawih lo.

Second half-ah Croatia an insiamṭha a, minute 57-naah Andrej Kramaric-a'n ball a chang rei hreta a lan hnuah goal-ah petin English midfielder Eric Dier-a ke a per hnuah keeper Jordan Pickford-a ban phak lohin a goal. Goal khat a luh chiah hian Croatia-in final round an lut a, England erawh League B-a tla thei dinhmunah an ding.

Southgate-a'n hlauh tur a nei tawh lo a, risk lain Delle Alli a luhtir hnuah Sancho leh Lingard te luhtirin substitution awmze nei a siam. Minute 78-naah Kane a thawhrah chu Lingard-a'n goal-ah a chantir a, hemi hnu hian Manchester United midfielder hian Marcelo Brozovic goal khung tur chu goalline aṭangin a pet chhuak leh bawk.

England-in relegate duh loin an nawr chhunzawm a, minute 85-naah Ben Chilwell-a freekick chu captain Kane-a'n chakna goal ni turin a tlawh lut. Luka Modric-a captain-na hnuaia khel Croatia team-in semifinal hial beisei mah se goal hnih an chhuah avangin an relegate.

England an lawm

England manager Gareth Southgate chuan, "Kumin chhunga ka lawmna ber chu supporter nen kan inkar ṭha hi a ni. Wembley Stadium sak thar hnuah tun ang renga ṭantu kan neih ṭhat kha ka hre ngai lo. First half-ah kan khel ṭha zawk a, goal kan chhuah hnuah kan tho leh a, hnehna kan chang dawn a nih chuan hun ṭha kan hlah nia kan ngaih hnuah pawh beiseina kan neih reng a ṭul a ni," tiin a sawi.

England captain Harry Kane chuan, "Mipui ṭhahnem tak hmuh a, kan chungah beiseina sang tak an nei tih hmuh khan inrintawkna tam tak min pe a ni. Kum ṭha tak kan hmang a, kan hmingṭhatna avanga ngaih ṭha taka awm hman erawh kan ni lo. He team hian nomawi chawi turin theihna a nei a ni," tiin mipui a fak.

England goalkeeper Jordan Pickford chuan, "Wembley-a mipui thawm ṭhat ber ṭum a ni a, mipuiin fak an phu. Nations League hian team ṭha ber hneh châkna min siam a, khawvela team ṭha 10 zinga tel pha pahnih hnehin semifinal kan lut leh ta. Nipui thlen hun a nghahhlelhawm hle," tiin final round khelh a châk thu a sawi.

League A - Group 4
# Team Pld W D L GF GA GD Pts
1 England 4 2 1 1 6 5 1 7
2 Spain 4 2 0 2 12 7 5 6
3 Croatia 4 1 1 2 4 10 -6 4

Nations League Thlirna Tawi
Nations Leag ue-ah hian England bakah Portugal leh Switzerland ten final round an lut tawh a, nizana Germany leh Netherlands inkhel result a zirin palina tur hi a hriat dawn. World Cup hnuhnung ber khel pha lo
Netherlands hian point an hlawh chhuak a nih chuan group 1 aṭangin semifinal an lut dawn a, an chak loh erawh chuan France an lut thung ang.

Semfinal-a inhmachhawn tur hi Dublin-ah December 3, Thawhṭanni zan dar 7:00-ah pawh a ni dawn. Inelna thleng tur tan final round thlen phak a ngai a, inelna hmasa ber hi Portugal-in an khawpui pahnih Porto leh Guimaraes-ah an thleng dawn.

June 5-6, 2019 hian semifinal khelh tur a ni a, final leh third place hi June 9-ah khelh a ni ang. Champion team hian nomawi (71 cm) a sang bakah euro maktaduai 7.5 an dawng dawn a, pahnihna (€6.5m), pathumna (€5.5m) leh palina (€4.5m) ten sum ṭhahnem tak an dawng bawk ang.

Final round lut pha tan Euro 2020 khelh theih dan kawng a inhawng zau hret bawk a, qualifying pangngaia an tling zo lo a nih pawhin playoff hmangin an lut thei ang. League A team tan hmun ruak pakhat zuah sak an ni a, league dang pathum tan hmunruak pakhat ṭheuh zuah a ni bawk.