Kawr kan neih chhung chu hlawhtling turin kan bei ang - Tuchel

Champions League last 16 chu zanin hian khelh zawh a ni dawn. Champion lai Chelsea-in zanin dar 1:30 hian Stade Pierre-Mauroy-ah Lille an hmachhawn ang. Blues hian Stamford Bridge-ah 2-0 in hnehna chang tawh mah se khelmual pawna an buaina avangin ngaihven an hlawh.

Inkhel dangah Juventus-in zanin dar 1:30 vek hian Allianz Stadium-ah Villarreal an mikhual ang. Europa League champion hian an mualah Old Lady hi 1-1 in an chelh a, inkhelh hmabak minute 90 hi a la nung khawp ang.

Hrem tawk Blues
Russia-in Ukraine a run avangin football-ah nghawng lian tak a awm chho zel a, British sorkar-in a hrek zingah Russia president Vladimir Putin nena inhnimhnai Roman Abramovich a tel.

Abramovich hi Chelsea neitu a nih avangin London club-in hrem an tuar a, an sum lakluhna tihtawpsak an nih bakah an sum hman tur thlengin an bithliahsak.

Chelsea manager Thomas Tuchel chuan, "Kan hmaa harsatna awm hi kan hmachhawn a ṭul. Thil ṭhahnem tak sawiho tur a awm a, zin dan tur thlengin ngaihtuah a ngai. Tun hmaa thil awlsam kha tunah chuan beng sika kan ngaihtuah ho a ṭul ta a ni," tiin an harsatna tawh chungchang a sawi.

German manager chuan sawi chhunzawmin, "Tuna kan hmabak chu Lille-a zin a, Lille hmachhawn a ni. Chhuanlam kan nei lo ang. Kawr kan neih chhung chu hlawhtling turin kan bei ang," tiin a sawi a, anmahni thlawp tlattute chungah lawmthu a sawi bawk.

Inkhel tur chu
Chelsea hi khelmual pawnah buai mah se khelmual chhungah erawh an la che ṭha zel. Blues hian an match hnuhnung paliah hnehna an chang vek a, kar tawp khan Newcastle United chu 1-0 in an hneh.

Tuchel chuan, "Newcastle lakah khan kan rilru put hmang te, kan tha hrui te leh kan theihna te fiahin a awm. Fiahna ṭha taka kan paltlang avangin ka lawm. Lille lakah pawh Newcastle laka kan khelh dan chiah khan kan khel leh ang," tiin a sawi.

Blues khingpui tur Lille hian Stamford Bridge-a an chak loh hnuah Lyon leh Clermont Foot te an hneh a, an match hnuhnung berah St Etienne nen goal awm loin an inhnehtawk.

Tuchel-a hote hi chak tur zawka ngaih ni mah se Lille hian tawnhriat nei ṭha player an kawl nual - chung zingah chuan Renato Sanches a tel. Portuguese midfielder hian Euro 2016-a a chet ṭhat vanglai ang khan a khel leh tawh a, danglamna thlen thei tur a ni.

Lille forward Jonathan David-a'n tun season-ah goal 17 a khung tawh a, buaipui tham a tling. French club hian goal hnih mamawh mah se goal an khung a nih ngat chuan mipui puihna nen Chelsea tan buaina tham a tling thei ang.

UCL Last 16
First leg
February 15, Thawhlehni
Paris Saint-Germain 1–0 Real Madrid
PSG: Kylian Mbappe 90+4'
Sporting Lisbon 0–5 Manchester City
MAN: Riyad Mahrez 7'; Bernardo Silva 17', 44'; Phil Foden 32'; Raheem Sterling 58'
February 16, Nilaini
RB Salzburg 1–1 FC Bayern Munich
RBS : Chukwubuike Adamu 21'
FCB : Kingsley Coman 90'
Inter Milan 0–2 Liverpool
LFC : Roberto Firmino 75'; Mohamed Salah 83'
February 22, Thawhlehni zan
Chelsea 2–0 Lille
CHE: Kai Havertz 8'; Christian Pulisic 63'
Villarreal 1–1 Juventus
VIL: Dani Parejo 66'
JUV: Dusan Vlahovic 1'
February 23, Nilaini zan
Atletico Madrid 1–1 Manchester United
ATM : Joao Felix 7'
MNU : Anthony Elanga 80'
Benfica 2–2 Ajax
BEN : Sebastien Haller 26' (OG); Roman Yaremchuk 72'
AJX : Dusan Tadic 18'; Sebastien Haller 29'
Second Leg
March 8, Thawhlehni Zan
Bayern Munich 7–1 Red Bull Salzburg
BAY: Robert Lewandowski 12' (P), 21' (P), 23'; Serge Gnabry 31'; Thomas Müller 54', 83'; Leroy Sané 85'
RBS: Maurits Kjærgaard 70'
Agg-ah Bayern 8-2 in an chak
Liverpool 0–1 Inter Milan
INT: Lautaro Martínez 61'
Agg-ah Liverpool 2-1 in an chak
March 8, Nilaini zan
Real Madrid 3–1 PSG
RMA : Karim Benzema 61', 76', 78'
PSG : Kylian Mbappe 39'
Agg-ah Real Madrid 3-2 in an chak
Manchester City 0–0 Sporting Lisbon
Agg-ah Manchester City 5-0 in an chak
Zanin Inkhel tur
Manchester United 01:30 AM Atletico Madrid
Ajax 01:30 AM Benfica
March 16, Nilaini zan
Juventus 01:30 AM Villarreal
Lille 01:30 AM Chelsea
*UCL-ah away goal rule a awm tawh lo.
*Second leg hi March thlaah khelh a ni ang.
*Quarterfinal a?angin draw neih ?hat leh tur a ni a, tute pawh an inhmachhawn thei ang.