Match 17 chak zawn thei Nadal

Rafael Nadal chuan kuminah hneh loh a la tawng lo. Spanish star hian Thawhṭanni zan khan Dan Evans hnehin Indian Wells last 16 a lut a, season kal laiah a zawnin match 17 chhung hnehna a chang ta.

Grand Slam vawi 21 champion tawh Nadal hian Britain tlangval hi 7-5, 6-3 in a hneh, a tir lamah a service hloh ve zuk mah se thil pawi a thlen hmain a insiamṭha thei; a match hmasa zawkah pawh Sebastian Korda lakah a lo 'comeback' tawh.

Nadal chuan, "A tir lam kha chu a harsa viau. Dan-a hi player ṭha a ni a, ani ka hneh thei a nih chuan ka khel ṭha tihna a ni. Hun pawimawh laia a vannei zawk ka ni hlauh ṭhin kha a lawmawm," a ti.

Last 16-ah chuan Nadal hian Reilly Opelka a hmachhawn leh ang. American player Opelka hian player ṭha leh champion tura rinkai zinga mi Denis Shapovalov chu 6-7 (4-7), 6-4, 6-4 in a hneh.

Nimin inkhel dangah Daniil Medvedev chu Gael Monfils lakah 4-6, 6-3, 6-1 in a chak lo. Kar hmasa lawka world number 1 nihna hauhtu Medvedev hi ranking chhuak tharah chuan pahnihnaah a tlahniam leh nghal dawn.

Russian star Medvedev hi nikuma a champion-na Marseille Open-ah a inlan lo a, a chet ṭhatna Indian Wells-ah quarterfinal a thleng phak lo bawk. Ranking point a neihsa a hum thei lo, chuvangin Novak Djokovic bawk a chungnung leh ang.

Inkhel dangah Stefanos Tsitsipas chuan 1-6, 6-3, 6-2 in Jenson Brooksby a hneh. Greek player hmaah Cameron Norrie a ding leh thung ang. Britain tlangval Norrie hian nikuma final-a a hneh Nikoloz Basilashvili chu 3-6, 6-3, 6-1 in a hneh nawn bawk.