ISL semifinal: Bagan tan a harsa tawh dawn

Indian Super League semifinal second leg-ah zanin hian ATK Mohun Bagan leh Hyderabad FC an intawng leh dawn a, Indian football-ah inkhel hmuhnawm en tur kan nei leh ta.

ISL league round-ah pawh football hmuhnawm lo pho chhuak tawhtu Hyderabad hian first leg-ah 3-1 in ATK Mohun Bagan an lo hneh tawh a, Kolkata club tan inkhel thlak danglam a harsa tawh dawn.

Bagan boss Juan Ferrando erawhin beiseina a la nei a, ISL coach hlawh hnem ber pawl chuan, "Hmahruaitu kan nih laia kan rilru puthmang kan thlak a ngai," a ti a, a naute chu chak duha tuihal turin a ti.

Telugoons
Hyderabad-in an match hnuhnung pangaah vawi li hnehna an chang thei a, chutihrual chuan match ngaah hian goal chhuah loh an nei miah lo - Bagan tan tlarhmaa Roy Krishna leh Liston Colaco ten Hyderabad panna lai hi hman thiam an mamawh tihna a ni.

Telugoons (Hyderabad sawina) tan Bartholomew Ogbeche bawk chu tlarhmaah innghahna a ni leh dawn a, Nigerian striker hian match 18-ah goal 18 a khung thei - Bagan hian tlarhnung laiah Tiri an chhawr thei dawn lo a, Ogbeche ven dan an duan uluk a ṭul ang.

Midfield-ah Hyderabad tan Joao Victor bawk chu hmuhnawm leh tur a ni a, kum 33 mi an captain hian match 19-ah goal nga khungin assist vawi khat a nei.

Harh ru!
Bagan-in si hnih phur sain an khel dawn a, a harsa dawn tih a chiang. Mahse, he team hian tlarhmaah Krishna leh Colaco chauh an nei lo a, striker 'form' Manvir Singh pawh an kawl tel - 'comeback' lantir thei turin an ṭha tawk.

Midfielder Joni Kauko hi Euro 2020-a Finland tana inlan thei kha a ni a, inkhelh a thiam ve tawk tih a chiang - tun season-ah goal thum khungin vawi ruk assist a nei a, vawi 14 ngawt key pass a nei.

Hyderabad-in final luh an duh chuan Finnish midfielder chelh dan an ngaihtuah a ṭul dawn tihna a ni. Hetihlai hian tlarhmaah David Williams dinhmun a chiang lo a, boruak sanga ṭangkai ṭhin striker tel lo tur hi Bagan tan uiawm a tling.

ISL Semifinal
 First Leg
March 11, Zirtawpni Zan
Jamshedpur 0 - 1 Kerala Blasters
KER: Sahal Abdul Samad 38'

March 12, Inrinni Zan
Hyderabad FC 3 - 1 ATK Mohun Bagan
HYD: Bartholomew Ogbeche 45+2'; Yasir Mohammad 58'; Javier Siverio 64'
AMB: Roy Krishna 18'

 Second Leg
Nizan Inkhel (Result kan hre hman lo)
Kerala Blasters 7:30 PM Jamshedpur FC

Zanin Inkhel Tur
ATK Mohun Bagan 7:30 PM Hyderabad FC

March 20, Pathianni Zan - Final
*Away goal rule hman a ni lo
*Inkhel pahnih belhkhawma goal khung tam zawkin final an lut ang.