Lazio tana goal khung hnem ber Immobile

Ciro Immobile chu Laizo tana Serie A goal khung hnem ber a ni ta. Italy international striker hian Venezia lakah goal khat khungin 1-0 in an chak a, a club tan hian league goal 144 a khung tling ta chiah.

Thawhṭanni zan Stadio Olimpico-a inkhelah captain Immobile-a goal hmasa chu offside vanga hnawlsak a ni. Second half-a a penalty khung erawh sawisel theih a ni lo, club tana record hmasa lo chelhtu Silvio Piola chu goal khatin a khum.

Italian legend Piola-a'n Serie A goal a khung zawng zawng chu 274 a ni. Lazio bakah hian Pro Vercelli, Torino, Novara leh Juventus tan a khel bawk. Italian football inelna sang bera goal khung hnem lama amah hnaih bertu chu Francesco Totti (250 goals) a ni.

Kum 32 mi Immobile chuan, "Team chungah ka lawm, match tin mai hian ka ṭhatna turin kan khel ṭhin, record ka siam theih chhan chu khelhpui ka neih ṭhat vang a ni. He hmuna ka thil tih hi ka chhuang, min thlawp tlattu fans chungah ka lawm hle bawk," a ti.

Immobile hian 2016 nipui lai khan Lazio hi a pan. Rome khawpui a pan aṭanga chhiar chuan, European league lian panga - England, Spain, Germany, France leh Italy huangah Lionel Messi leh Robert Lewandowski te chauh Immobile aia league goal khung hnem an awm.

Kar tawp Serie A inkhel dangah Atalanta leh AS Roma te an chak zo lo a,an elpui an chak zawh loh laia point thum hmu thei Lazio tan European football khelh beiseina a sang chho zel.

Lazio hian point 49 hmuin pangana dinhmun an luah a, an hnuaiah point 48 hmu pahnih Atalanta leh Roma te an awm. Chak lo Venezia erawh relegation zone-ah an la awm, a him china mi Cagliari an phak lohna chu point thum a ni.