Real-in hma an hruai fal zel

La Liga-ah champion tur rin a harsa lo tawlh tawlh - Real Madrid chuan Thawhṭanni zan khan an mikhualna ramah Real Mallorca chu 3-0 in an hneh a, league-ah point 10-in hma an hruai fal ta.

Real tan Karim Benzema chuan goal hnih a khung a, Vinicius Jr chuan goal khat a thawh ve bawk. Mualneitu Mallorca lamin a chhanletna tur an nei lo a, awlsam takin Real an chak.

Madrid khaw club hian hnehna an chan avangin match 28-ah point 66 an nei ta a, anmahni hnaih bertu Sevilla-in khelh zat inangah point 56 chiah an neih avangin champion an hnaih ta hle.

Hetihrual hian Real tan thlamuang taka awm a la hun lo - an league match hmasa berah, March 20 zan khian Barcelona nen an inhmachhawn zui leh dawn a, tawlhthlu thei reng an la ni.

Vinícius phawt
Nilaini zan khan Real Madrid-in Champions League last 16 second leg-ah Paris St-Germain chu 3-1 in an hneh a, inkhel hmasa nena belhkhawmin 3-2 in an tlang.

Real-in match hautak an khelh avangin Carlo Ancelotti-a'n player pawimawh ṭhenkhat a hahdamtir chu rin dan a ni a, mahse, Italian coach hian a neih ṭhat ber a thawhchhuahpui.

Heti chung hian Real-in first half chhungin goal an khung lo a, an khung hnuah erawh an hawikir tawh lo - minute 55-naah Benzema siamsak chu Vinicius chuan goal-ah a chantir.

Kum 21 mi forward hian tun season-ah match 37 khelin goal 16 a khung tawh a, assist vawi 13 a nei bawk. Real tan season dangah goal ruk aia tam khung a nei ngai lo a, King Carlo hnuaiah a vul hle.

Fak tlak Benzema
Vinícius-a goal khung tur a siamsak a, Benzema goal khung hun a her chhuak ve thung - minute 77-naah Vinicius hian penalty a hlawh chhuak a, a pet turin Benzema a lo pen chhuak.

Kum 34 mi striker hian a la tar lo tih pholangin goal-ah a chantir a, minute 82-naah Marcelo siamsak chu a tauh lut bawk. PSG laka hattrick siamtu striker hi a la tar mawlh lo.

France international hian tun season inelna hrang hrangah match 34 khelin goal 32 a khung tling ta der a, assist vawi 12 ngawt a nei bawk - a nep lo hle.

Benzema hian a career-ah match 835 khelin goal 413 ngawt a khung tling ta a, French footballer zinga goal khung hnem ber record chelh rengtu, match 917-a goal 411 khungtu Thierry Henry (411) chu a khum.

King Carlo
Real-in hnehna an chang a, Champions League last 16 aṭanga PSG pet chhuaktu ni bawk Carlo Ancelotti chu khawvelin a fak rawn - a awm lo hran lo.

Italian boss hian Real hi a champion pui thei a nih ngat chuan European top five league-a champion vek thei coach hmasa ber a ni dawn - uanpui tham a ni.

Carlo Ancelotti hian 2013-15 season inkar khan Real Madrid hi a lo enkawl tawh a, Champions League leh Club World Cup-ah nomawi chawipui mah se league-ah erawh a hlawhtlinpui lo.

Madrid khaw club a chhuahsan hnuah Bayern Munich, Napoli leh Everton a enkawl hman a, tun season ṭan dawn khan Real hi a vawi hnih nan a pan a, a hnathawh ṭhatzia chu a hretute kan ni e.

Hmabak hautak
Real tan champion a hnai sawt a, hetihrual hian Mallorca laka an inkhelah hian chanchin lawmawm lo hawn tur an nei ve tho.

Goal hnih khungtu Benzema, Brazilian winger Rodrygo leh France left back Ferland Mendy te chu hliam vangin lakchhuah an ngai a, El Clasico khel lo thei dinhmunah an ding.

Madrid boss Ancelotti chuan, "Thil serious tak niin a lang lo a, Rodrygo hian inkhelh laia an intauh avangin na a nei a, Mendy hi a malpui a na deuh a, Benzema pawh a zuanna lamah a chesual deuh.

"Pathianni inkhel tur atan an dam hman dawn leh dawn loh kan thlir ang," a ti a, a bik takin Benzema hi chhawr theih hram a duh khawp ang.