India-in Sri Lanka an sawp

India cricket team-in an mikhual Sri Lanka chungah zahngaihna an lantir lo a, Test match vawi hnih an khehah chiang takin an hneh ve ve.

Test match hnuhnung zawk hi March 12-14 khan khelh a ni a, 238 runs-in India an chak. Test match khelh hma hian T20-ah 3-0 in Rohit Sharma hoten hnehna an chang tawh bawk.

M Chinnaswamy Stadium, Bangalore-a inkhelah ṭhumvawra vannei Rohit Sharma-a'n bat hmasak a thlang a, Shreyas Iyer (92) leh Rishabh Pant (39) te zarah 252 runs an siam.

Second Test-ah bowler an langsar a; Jasprit Bumrah (24/5), Ravinchandran Ashwin (30/2) leh Mohammed Shami (18/2) te an chet ṭhat avangin Sri Lanka-in 109 runs chauh an siam.

India-in second innings-ah 303 runs an siam tihin wicket kua an hloh a, an duhtawk. Shreyas Iyer (67) leh Rishabh Pant ten (50) ten half century an siam ve ve.

Sri Lanka tan chak turin 447 runs a siam a, captain Dimuth Karunaratne-a'n 107 runs siam mah se Lions batter ten Indian bowler Ravinchandran Ashwin (55/4) leh Jasprit Bumrah (23/3) te an ngam lo.

Second innings-ah Sri Lanka hian 208 runs an siam a, India-in 238 runs-in hnehna an chang. India captain Rohit Sharma chuan, "Kan khelh tawh dan a lungawi thlak. India-in pink ball match vawi thum kan khelhna a ni a, inzirna tur a la tam. Chutihrualin entu erawh an ṭhat phah hle," tiin a sawi.

Test match-ah hian ball sen an hmang ṭhin a, chhun leh zana an khelh hian pink ball (ball sen dang) an hmang thung. Tun ṭuma India leh Sri Lanka te inkhel hi chhun leh zana khelh a ni.