Point 60 nei thei Anthony Towns

Karl-Anthony Towns chuan nimin zing khan point 60 zet a nei. NBA regular season kal laiah match khata point a neih hnem ber ṭum tawngin, a team Minnesota Timberwolves chu San Antonio Spurs lakah 149-139 in a chakpui.

Timberwolves hian vawi 40 hnehna an chang tling ta chiah bawk. Western Conference-ah pasarihna dinhmun luahin a thiam zual pariat inelna playoff khel turin an dinhmun an sawhnghet zel.

Minnesota Timberwolves coach Chris Finch chuan, "Talent a nei ṭha a, a ti pung bawk," tiin a player a fak. Towns-a chuan a teammate-te puihna zarah chauh point nei hnem thei a nih thu a sawi ve bawk.

Nimin zing inkhel dangah Golden State Warriors chuan Washington Wizards 126-112 in an hneh, hnehna an chan theih nan Stephen Curry chuan point 40 neiin a thawh hlawk hle.

Golden State tan Draymond Green chu match 32 hnuah a lo kir leh thei tawh a, an player pawimawh hi hun rei tak hliam vanga a chawlh hnuah a inkhel thei ve leh chiah. Kum 2019 hnua a vawi khat nan Curry, Green leh Klay Thompson te a rualin an inkhel leh ta.

Inkhel dangah season hmang ṭha tak Joel Embiid chuan Philadelphia 76ers chu Denver Nuggets lakah 114-110 in a chakpui. Embiid hian point 34 a nei a, nikuma Most Valuable Player Nikola Jokic chuan Nuggets tan point 22 a nei thung.

Los Angeles Lakers an che fuh hleithei lo zel. LeBron James awmna team hi Toronto Raptors lakah 114-103 in an chak lo, an match hnuhnung pangaah vawi li an tlawmna a ni. Table-ah pakuana an nih avangin playoff khel phak turin hmasawn an ngai.

Champion lai Milwaukee Bucks, Atlanta Hawks, Charlotte Hornets, Sacramento Kings leh Cleveland Cavaliers ten hnehna an chang vek bawk.

NBA - Nimin Results
Charlotte Hornets 134 - 116 Oklahoma City Thunder
Minnesota Timberwolves 143 - 139 San Antonio Spurs
Washington Wizards 112 - 126 Golden State Warriors
Chicago Bulls 103 - 112 Sacramento Kings
Milwaukee Bucks 117 - 111 Utah Jazz
Toronto Raptors 114 - 103 Los Angeles Lakers