City an chelh; City umtu Liverpool hmaah Arsenal

Premier League a 'hot' tawlh tawlh - Thawhṭanni zan khan Crystal Palace chuan 0-0 in Manchester City an chelh a, Liverpool tan result lawmawm a ni.

City leh Liverpool inkarah point li chiah a awm tawh a, Pep Guardiola naute aiin Reds hi match khatin an la khel tlem zawk - match khat hi chak se, an inkarah point khat chauh a awm dawn.

Liverpool hi Etihad Stadium-ah an la leng dawn a, a awlsam zawnga sawisak chuan Reds hian an hmabak match-ah hnehna an chan vek chuan Premier League champion an ni ang.

Mahse, Liverpool tan hna a harsa nghal dawn - zanin dar 1:45-ah Arsenal an lenchilh dawn a, tun hnaia harhtharna chang Gunners laka chak hi a awlsam dawn lo.

Goal khung harsa
City boss Pep Guardiola-a'n, "Coach ka nih hnuah Liverpool tluka elpui hautak ka la nei lo," tiin a lo sawi tawh a, tun hnaiah, "Red vang hian hahdam taka ṭhut pawh a harsa a nih hi," tiin a sawi bawk - Jurgen Klopp leh a naute vangin a hahdam thei lo.

Pep hian vawi khat chetsual pawi theihzia a hrechiang viau a, mahse, coach ṭha meuh tan pawh chak reng theih a ni bik lo. Palace khelmualah point thum hmuh beisei mah se point khat nen an haw.

City-in ṭum dang ang thoin inkhel thunun mah se Palace tlarhnung an ṭang tlang thei a, an vannei tel bawk. Joao Cancelo chuan post a pet per a, a per lehlam chu khung ngei tur niin lang mah se Aymeric Laporte chuan a khung lo bawk!

Captain Kevin de Bruyne, Riyad Mahrez leh Bernardo Silva te pawhin City tan chance duhawm an nei a, mahse, an chhawr thei lo vek - a tawpah Palace an lawm zawk a, Premier League nomawi inchuh boruak nung sa a nung lehzual.

Dinhmun duhawm zawk
City an chak zo lo a, media titi tui ber chu Liverpool nen an inkara point awm zat chu a ni - kar riat liam taa point 13 ngawta sang fal chunga table chung bera awm City kha point li chiahin an sang ta.

Manchester City midfielder Bernardo Silva chuan, "Match kua khelh tur kan la nei a, kan awmna hi Liverpool awmna ai chuan a la duhawm zawk tho tho. Kan intawn hunah kan stadium-a an rawn khelh a ngai dawn bawk a, boruak a sang khawp ang," a ti.

Silva thusawi a dik a, chutihrual chuan elpui team aia dinhmun duhawm zawk thu sawi a ngaih tawh chuan dinhmun a derthawng tihna a ni a, City thla a muang lo.

City boss Pep Guardiola chuan, "Football-ah vanneihna a awm ngai lo. Goal khung kan mamawh a, mahse, kan khung lo a ni," tiin chhuanlam a zawng lo a, Spanish manager tan league nomawi chawi loh hi mualphona a tling ang.

Arsenal - an vanglai!
Gunners-in season bul ṭan ṭha lo mah se tun hnaiah harhtharna an chang a, league match nga zet chu a zawnin an chak tawh - Liverpool tan Arsenal khelmuala lenluh a châkawm loh vanglai tak a ni.

Chutihrual chuan Liverpool hian November 20, 2021-a thil thleng kha an la hre reng ang. Arsenal hi Anfield-ah 4-0 ngawtin an sawp a, zaninah thawnthu hlui herlum leh an tum dawn.

Mikel Arteta naute hi league match-ah vawi sarih an tlawm tawh a, mahse, heng zinga vawi hnih chiah hi Emirates Stadium-ah an tlawm a, mahni tualzawlah chuan Liverpool hlauh bik an tum dawn lo.

Reds hian tun season-a Emirates Stadium an len hmasakah hnehna an chang tih erawh hriat tel sak a ṭha a, January khan League Cup semifinal aṭangin Arsenal hi an khelmualah ngei an pet chhuak.

Champion tum
Liverpool-in Premier League nomawi chawi an tum a, Arsenal-in Champions League khelh an tum thung - team pahnih tum inang lo mah se an tum ram thleng tura inelna boruak erawh a sang a, team pahnih tan chak ve ve a ngai.

Reds hian zaninah Arsenal an hneh chuan, khelh zat inangah point khat lekin City an thlau dawn a, City an la hmachhawn dawn bawk avangin champion beiseina a sang sawt ang.

Liverpool hi league match riat chhung chu a zawnin an chak tawh a, hetih chhung hian League Cup-ah an champion a, FA Cup leh Champions League-ah quarterfinal an lut bawk - an phur vanglai tak a ni.

Arsenal hian zanina an tlawm chuan, an hnuaia Manchester United, West Ham leh Tottenham Hotspur te ho hi an phur sawt ang tih an hre ve reng a, an elpui team tan chance siam an duh lo ang.

Arsenal vanneihna
Eng team pawhin Liverpool hma-chhawn an châk loh chhan sawi dawn se, mimal hmingah chuan Mohamed Salah hming hi an lam chhuah hmasak pawl a ni ang - mahse, Egyptian forward hian Arsenal a hmachhawn thei lo mai thei!

Liverpool nen contract thar chungchanga indawr fuh thei lo Salah hi Brighton & Hove Albion laka an chak ṭumin a inhliam a, Reds manager Jurgen Klopp chuan nimin khan, "Training tura a inpeih thu hrilh ka ni a, kan la enfiah leh ang," a ti.

Tun season-a goal 28 khung tawh forward hi a inlan loh chuan Arsenal thaw a veng sawt ang tih a chiang a, chutihrual chuan Reds hian Sadio Mane, Diogo Jota leh Luis Díaz an la nei tho tih hriat erawh a ṭha.

Reds player zingah James Milner, Kostas Tsimikas leh Roberto Firmino te chu hliam vanga inkhel thei lo tura sawi an ni a, Liverpool tan buaina lutuk tur erawh niin a lang lo.

Beiseina
Lehkhaa en mai chuan Liverpool chu team ṭha zawk an ni a, mahse, result hi lehkhaah ni loin, khelmuala chinfel tur a nih avangin eng pawh thleng thei a ni.

Arsenal hian an match hnuhnung berah team ṭha Leicester City chu 2-0 in an hneh thei a, Foxes hi December-a Liverpool hnehtu an ni tih hriat tel sak a ṭha.

Arteta chuan, "Keini aia team ṭha zawk he ramah hian an la awm nual a, chumi tifiahtu chu league table a ni. Eng hna ropui mah kan la thawk lo," a ti a, tun hnai result vanga phur hluai thei an nih loh thu a sawi.

Arsenal tan goalkeeper Aaron Ramsdale chu innghahna tur a ni leh dawn a, Leicester boss Brendan Rodgers-a'n, "England keeper ṭha ber," a tih hian European football-a tlarhma hmuhnawm ber pawl a hmachhawn dawn - a ṭhat tawk leh tawk loh fiahna hun a ni.

England-a team ṭha ber kan tum dawn a, anni hneh tur chuan kan ṭhat dan bera kan khelh a ngai dawn a ni. Game-a thil thleng zawng zawng thunun thei team kan tum dawn a, chutiang team hmachhawn tur chuan kan theihna sang bera khelh a ngai ṭhin. - Mikel Arteta, Arsenal manager

City inkhel kha zirchian ka duh avangin minute 65 chiah chiah ka en a, a tak taka en turin hun ka nei tam tawk lo. Palace an khel ṭha a, City pawh an khel ṭha - a tawp an khar ṭhin lo mai zawk a ni. Chutihrual chuan result khan min barakhaih viau tho. City chak loh vangin kan hlim em? Engvangin nge kan lo hlim ve ngawt ang? Arsenal kan la hmachhawn dawn a, point hmu tur anga insawi lawk a rem lo - nangni tan chuan sawi a awlsam mai thei a, mahse, City kan thlauhna hi point li lai a la ni. Kan inkhelh leh phawt a la ngai a, Premier League-a hlawhtlin duh a, hmahruaitu nih bawk si loh chuan kan chak zel a, team dangin point an hloh zel a ngai ve bawk. - Jurgen Klopp, Liverpool manager