Ram tan Eriksen an ko leh ta!

Christian Eriksen chu Denmark tana khel turin an ko leh ta. Lungphuchawl vanga khelmual chhunga tlu tawh a ni a, a thawk pui turin khawl hman a ngai hial - mahse football khel turin a dam a, club chauh ni loin ram tan pawh a khel leh dawn.

Euro 2020-a vanduaina a tawh khan lainattu a ngah. Khawl hman a ngaih tak avangin Serie A danah a inkhelh ve a rem lo. Premier League-ah erawh a inkhel thei; Inter nen an inṭhen hnu hian Brentford chu thla ruk chhung a tan a zawm.

Tun hnaiah Eriksen hian match pangngai a khel leh thei tawh a, ram tana an ko pawh hi a mak lo. Denmark hian March 26 hian Netherlands an khel dawn a, chumi hnuah Serbia an hmachhawn leh ang - match pahnih hi friendly match tur a ni ang.

Denmark coach Kasper Hjulmand chuan, "Tun hnaiah Eriksen hi ka thlithlai nasa, match pangngai a khel mai bakah a training lai pawh ka en, a dinhmun a ṭha tawkah ka ngai, a taksa pawh a chak ṭha.

"Tun hma lama a theihna sang tak ang lanchhuah tir leh tur erawh chuan hun a la mamawh deuh dawn. Chutih rualin tuna a khelh dan pawh a ṭha tawk hle," tiin a player chungah beisei a la nei sang hle.

Kum 30 mi Eriksen hian ram tan match 109 a khel tawh a, goal 36 a khung. Denmark hi Qatar World Cup khel turin an tling fel tawh a, harsatna lian tak a thleng leh a nih ngawt loh chuan Eriksen-a hmel pawh kan hmu leh ang.