Aizawl FC chhandamtu Notea

Aizawl FC-in match hmasa palia an khingpui an hneh loh vek hnuah chak hmel an hmu a, nimin tlai khan injury time-a Durtlang tlangval Lalliansanga (Notea) goal hnih hmangin Sudeva Delhi 2-1 in an hneh. Mizo club hian table mawngphah aṭangin 11-naah an inhlangkai.

Naihati Stadium-a inkhelah Aizawl FC-in hrem vangin Vanlalnghenga an chhawr thei lo a, hliam vangin Willis Plaza an chhawr thei lo bawk. Amaherawhchu Rajasthan FC an hneh loh ṭuma hnawhchhuah Robert Primus leh R. Malsawmtluanga te an rawn kir.

Tun season bikah nimin inkhel hi Aizawl FC an la kim teuh ber a ni a, an ṭhat dan berin an khel teuh ta hle. Sudeva lakah MS-a, Samuel Lalmuanpuia leh Ayush Chhetri ten bul an ṭan thei a, Mizo club-in beiseina sang tak an nei.

Delhi club-ah Vanlalzuidika Chhak-chhuak, Sairuatkima, Lalliansanga Renthlei leh R. Lawmnasangzuala ten bul an ṭan a, Mizo club hmachhawn turin Mizo pali an awm.

Sudeva-in bul an ṭan ṭha a, minute lina lekah Sairuatkima cross chu Nischal Chandan-a'n a tauh lut. Aizawl FC-in ṭum dang ang thoin passing game an khel a, inkhel thununtu zawk ni mah se goal khung an harsat.

Aizawl FC-in risk an la a, minute 88-naah defender Lalfelkima aiah Lalliansanga a luhtir. Mizoram Premier League-a hming chher tawh Notea'n a theihna lantir turin hun a mamawh rei lo, injury time minute khatnaah Ramhlunchhunga pass chu goal kilah a pet lut.

Mizo club an phur a, an vannei tel bawk. Box pawn aṭanga MS-a ball pet chu Sudeva defender-in dang perin Notea zawnah a tla fuh a, Durtlang tlangvalin injury time minute thumnaah chakna goal a khung.

Aizawl FC hian RoundGlass Punjab an hmachhawn ṭumin injury time-a goal hnih an chhuah avangin an chak lo a, Sudeva lakah erawh injury time-a goal hnih an khung avangin hnehna an chang. Mizo club-in match nganaah chak hmel hmu chauh mah se an chak dan leh an khelh dan vangin an phur thar.

Coach Yan Law chuan, "Kan khel ṭha ziah a, kan vanduai leh ṭhin. Tun ṭumah erawh kan vannei ta a, ka lawm takzet. Tun season-ah kan khelh ṭhat phu khawpin point kan la hmu lo a, tuna kan hnehna chan hi a bul ṭanna tur a ni. Player-te pawh an kim chho a, a hnuai ber aṭangin a chung berah kan la awm theih kan ring," tiin Vanglaini a hrilh.

Nimin Inkhel Result
Sudeva Delhi 1 - 2 Aizawl FC
SUD : Nischal Chandan 4'
AFC : Lalliansanga 90+1', 90+3'

Vawiin Inkhel Tur
Rajasthan FC 2:00 PM Indian Arrows
Mohammedan SC 4:30 PM Churchill Brothers
Trau 7:30 PM Kenkre