Atletico-in Ronaldo telna Man United an pet chhuak
Cristiano Ronaldo-a'n Old Trafford-a a kir hnua season hmasa berah Manchester United nomawi a chawipui thei dawn lo. Portugal captain hian ropui lai te chu nei bawk mah se Barcelona aṭanga Paris Saint Germain pantu Lionel Messi ang thoin tun season-ah a hlawhchham.
Ralf Rangnick hoten hian Thawhlehni zan khan Atletico Madrid an hneh lo a, an nomawi beiseina awmchhun Champions League aṭangin an tla. Diego Simeone hote tan Renan Lodi-a'n goal hlu bik a khung a, Spanish club hian Old Trafford-ah 1-0 in hnehna an chang. First leg-ah 1-1 in an inhnehtawk a, aggregate-ah Atletico 2-1 in an chak.
Ronaldo leh a ṭhiante
Manchester United-in kartawpah Tottenham 3-2 in an hneh a, Atletico laka hattrick siamtu Ronaldo a langsar. German manager Rangnick-a'n inkhel pawimawhah tawnhriat nei ṭha Paul Pogba, Nemanja Matic leh Marcus Rashford te bench-a dah a thlang.
Bruno Fernandes a dam tawh a, Pogba aia thlan a ni. Matic leh Rashford te aiah Scott McTominay leh Anthony Elanga te an lut a, Rangnick-a'n thahrui nei ngah a ngai pawimawhah a ngaih theih.
Atletico-in bench-ah Luis Suarez an dah a, tlarhmaah Joao Felix leh Antoine Griezmann te an la dah thei. Tlarhnungah Jose Maria Gimenez a dam hman a, Spanish club-in hliam leh hrem nei bawk mah se an squad a chhah ṭha tih a lang.
Goal khat a hlu
Man United-in bul an ṭan chhe lo a, Elanga hmangin ṭum hnih ngawt Atletico tlarhnung an rum ṭhaih nghal. Ding lam aṭanga Bruno Fernades cross chu Elanga-a'n goal-ah pet mah se keeper Jan Oblak hmai a per.
Atletico an insiamrem a, box pawn aṭanga Rodrigo De Paul ball pet chu David de Gea-a'n a dang ṭha hle. Minute 33-naah Koke, Marcos Llorente leh Joao Felix ten chiang takin Man United tlarhnung an ṭhiat a, Portuguese forward hian goal-ah chantir mah se ball petu Llorente a offside vangin an pawm lo.
Minute 41-naah Atletico bawkin Man United tlarhnung an ṭhiat nawn a, ding lam aṭanga Griezmann-a cross chu vengtu nei lo Lodi-a'n a tauh goal. Keeper De Gea dem a harsa a, right back Diogo Dalot erawhin mawh a phur lian hle.
Fernandes-a'n Atletico tan Oblak tan hna siam mah se goal a luh belh lo. Second half-ah Elanga-a'n mualneitu tan chance a nei a, goal zawnah a kal lo. Jadon Sancho-a'n Diogo Dalot-a cross a volley over bawk.
Rangnick-a'n bench aṭangin Paul Pogba, Juan Mata, Marcus Rashford leh Edinson Cavani te luhtir mah se mual chhunga awm sa Ronaldo ang thoin Atletico tlarhnungten an chelh.
Eng nge an sawi?
Atletico midfielde Koke chuan, "Tun season-ah chet ṭhat chang leh chet chhiat chang kan nei a, hemi a nih avang hian Champions League-a la dam hi kan tan a pawimawh lehzual. First leg-ah khan chak phu zawk kan ni a, quarterfinal lut turin kan thawkrim bawk. Ka thlirnaah chuan Oblak hi khawvela keeper ṭha a ni," tiin a sawi.
Atletico tan Koke hi a khel ṭha a, Old Trafford-ah a langsar hle. Team chhungah team a ho ṭha a, tlarhma leh hnung a ho ṭha. Minute 80-naah hliam vangin lakchhuah a ni a, heti chung hian Man United an hnehna kawngah a pawimawh takzet.
Manchester United goalkeeper David de Gea chuan, "Kan result a ṭha tawk lo a, pawi kan ti. Inkhel pahnihah kan khel ṭha tawk lo ve ve. Kan khingpuiten tawnhriat ṭha tak an ei a, inkhel pawimawha khelh dan an thiam a ni. Goal an khung hnuah an tlarhnung an tiphui ṭha a, chance insiam pawh kan harsat," tiin chak an phu loh thu a sawi.
Hmabak chu
Ralf Rangick hote tan insiamremna hun a awm dawn a, April 2-ah a inlan leh chauh dawn. Man United hi FA Cup-ah an tlak tawh avangin tunkar tawpah an awl dawn a, international break-in a chhunzawm ang.
Man United hi table-ah panganaah an awm a, season thara Champions League khel turin Arsenal result an thlir tel a ngai. Sir Alex Ferugson-a awm loh hnuah Man United an talbuai a, sum hmang tam mah se hmasawn aiin tlak hniam an la pan zel.
Atletico Madrid erawh Man United aiin an dinhmun a ṭha hret a, La Liga-ah palinaah an awm mek. Diego Simeone hote hian March 19, Inrinni zanah Rayo Vallecano an hmachhawn ang.
UCL Last 16
First leg
February 15, Thawhlehni
Paris Saint-Germain 1–0 Real Madrid
PSG: Kylian Mbappe 90+4'
Sporting Lisbon 0–5 Manchester City
MAN: Riyad Mahrez 7'; Bernardo Silva 17', 44'; Phil Foden 32'; Raheem Sterling 58'
February 16, Nilaini
RB Salzburg 1–1 FC Bayern Munich
RBS : Chukwubuike Adamu 21'
FCB : Kingsley Coman 90'
Inter Milan 0–2 Liverpool
LFC : Roberto Firmino 75'; Mohamed Salah 83'
February 22, Thawhlehni zan
Chelsea 2–0 Lille
CHE: Kai Havertz 8'; Christian Pulisic 63'
Villarreal 1–1 Juventus
VIL: Dani Parejo 66'
JUV: Dusan Vlahovic 1'
February 23, Nilaini zan
Atletico Madrid 1–1 Manchester United
ATM : Joao Felix 7'
MNU : Anthony Elanga 80'
Benfica 2–2 Ajax
BEN : Sebastien Haller 26' (OG); Roman Yaremchuk 72'
AJX : Dusan Tadic 18'; Sebastien Haller 29'
Second Leg
March 8, Thawhlehni Zan
Bayern Munich 7–1 Red Bull Salzburg
BAY: Robert Lewandowski 12' (P), 21' (P), 23'; Serge Gnabry 31'; Thomas Müller 54', 83'; Leroy Sané 85'
RBS: Maurits Kjærgaard 70'
Agg-ah Bayern 8-2 in an chak
Liverpool 0–1 Inter Milan
INT: Lautaro Martínez 61'
Agg-ah Liverpool 2-1 in an chak
March 8, Nilaini zan
Real Madrid 3–1 PSG
RMA : Karim Benzema 61', 76', 78'
PSG : Kylian Mbappe 39'
Agg-ah Real Madrid 3-2 in an chak
Manchester City 0–0 Sporting Lisbon
Agg-ah Manchester City 5-0 in an chak
March 15, Thawhlehni zan
Manchester United 0 - 1 Atletico Madrid
ATM : Renan Lodi 41'
Agg-ah Atletico 2-1 in an chak
Ajax 0 - 1 Benfica
BEN : Darwin Nunez 77'
Agg-ah Benfica 2-1 in an chak
Nizan Inkhel (Result kan hre hman lo)
Juventus 01:30 AM Villarreal
Lille 01:30 AM Chelsea
*UCL-ah away goal rule a awm tawh lo.
*Second leg hi March thlaah khelh a ni ang.
*Quarterfinal a?angin draw neih ?hat leh tur a ni a, tute pawh an inhmachhawn thei ang.