Berrettini a la dam zel

Daniil Medvedev, Alexander Zverev leh Stefanos Tsitsipas te an tla tawh a, player langsar an liam nasa tawh hle. Matteo Berrettini erawh Indian Wells-ah a la inhamtang zel thung, world number 6 hian Lloyd Harris hnehin quarterfinal a lut.

Italian tlangval hian a vawi khat nan ATP Masters 1000 lak a tum mek a, a kalkawnga ding South African player hi 6-4, 7-5 in a hneh. A khingpui hian set hnihna bikah set point vawi hnih a hmu a, mahse chesual thui duh loin set a la tlang.

Wimbledon 2021 finalist Berrettini chuan, "A nihna tak sawi chuan ka hlauthawng hman, set hnihna ka khel ṭha tawk lo hle. Mahse, a tawpah erawh dinhmun ṭha zawk ka ni. Hun pawimawh lai taka a service ka chhuhsak thei kha a lawmawm," a ti.

Kum 25 mi Berrettini hian a match lehpekah chuan Miomir Kecma-novic a hmachawn leh ang. California thlalera inelna neih laiah hian Rafael Nadal pawh a la dam, nizan khan Nadal hi inlanin result kan hre hman lo.

Indian Wells-ah hian player beiseiawm Zverev chu hneh nei loin a tla. Medvedev pawh world number 1 nihna hum thei loin second round-ah a zinkawng a tawp. Stefanos Tsitsipas chu a match hnihna lekah Jenson Brooksby hneh loin a lo tla tawh bawk.