Stadium khatin inkhel en dawn

World Cup khel tur zawnna playoff khelh hun a hnai. Italy health minister Roberto Speranza chuan kar leha North Macedonia an mikhual hunah stadium khat tlatin fans an luh theih tur thu a sawi chiang.

Italy ramah hian Serie A entu hi tun thlengin 75% chauh an la lut thei. Hri leng hi a la reh lo a, darh hluai lo mah se kai thar an la awm reng. Tun ṭuma inkhel tur erawh World Cup khelh leh khelh loh inkar a nih avangin a pawimawh.

Speranza chuan, "Inkharkhipna a awm lo ang, inkhel entu hi 100% an ni thei ang," a ti. Hripui karah pawh football ngaina ram hian theihtawp an chhuah dawn, fans ṭangkaina an hrechiang bawk.

Italy hian March 24 hian Palermo khelmual Stadio Barbera-ah North Macedonia an mikhual dawn, stadium hi mipui 36,000 lenna chauh a ni. An chak a nih pawhin Portugal leh Turkey inkhela chak zawk an paltlang leh a la ngai dawn.