Puitea hoin Kerala Blasters-in final lut

Zaipawl hruaituin zaipawl thiam tak a kaihruai angin K. Lalṭhathanga (Puitea) chu Kerala Blasters inkhel khaikhawmtu a ni a, Bethlehem Vengthlang tlangval hian football mawina a phochhuah ṭhin avangin Blasters fan-te atchilh rawn a hlawh mek.

Thawhlehni zan khan Indian Super League semifinal inkhelah Blasters hian Jamshedpur FC chu 1-1 in an inhnehtawkpui a, inkhel hmasa zawkah 1-0 a an lo hneh tawh bawk avangin 2-1 in an tlang.

Blasters tan Adrian Luna chuan goal hmahruai a khung a, goal hnih mamawh Jamshedpur-in Pronay Halder-a goal khat bak an neih theih loh avangin an tla a, nizan ATK Mohun Bagan leh Hyderabad FC inkhel chak zawk chu final-ah an hmachhawn ang.

Puitea'n Blasters tan a khel tluan a, Jamshedpur lamah Ricky Lallawmawma leh Laldinliana Renthlei ten bul an ṭan a, Dinliana hi minute 27-naah PC Laldinpuia chuan hliam vangin a thlak.

Blasters an chungnung
Jamshedpur-in goal khung an mamawh zawk a, mahse, bul ṭan ṭha zawk erawh Blasters an ni - minute hnihna lekah Alvaro Vazquez chuan chance duhawm zet a nei nghal.

Mahse, Espanyol striker hlui hian pangngai taka shot aiin goalkeeper TP Rehenesh 'chip' khum a thlang a, a tum ang ngeiin Indian keeper pet khum mah se goal zawnah a kal lo.

Minute 10-naah Blasters-in chance duhawm an nei chhunzawm a, Peter Hartley-a ball petchhuahin Blasters player a per hnuah goal bar a per a, a per lehlam hi Jorge Diaz chuan a khungah inngai mah se linesman-in offside a phar a, Blasters an vanduai.

Kerala club an vanduai reng lo - minute 18-naah Adrián Luna chuan Men of Steel defender rual a bum hnuah mawi zetin goal a khung a, Uruguayan attacking midfielder goal khung hi goal class bik a ni.

JFC harhna
Jamshedpur-in goal an chhuah a, chak turin goal thum tal khung a ngai tawh dawn tih an hria. Blasters an nawr let zui a, Greg Stewart-a freekick aṭanga ball kal chu Daniel Chima Chukwu chuan lo khung mah se offside vangin pawm a ni lo.

Minute 50-naah Jamshedpur-in goal an khung ta nge nge a, Stewart-a freekick aṭanga ball kal chu Pronay Halder chuan goal-ah a chantir a, 1-1 a ni.

Blasters tan Alvaro Vazquez chuan chance duhawm a rawn nei ve zui a, mahse, a ball 'chip' Rehenesh-a khawih thawi chu Eli Sabia chuan goal line aṭangin a lo pet chhuak hman.

Jamshedpur tan Ishan Pandita chuan chance duhawm vawi hnih ngawt nei zui mah se goal-ah a chantir thei lo a, Stewart-a vanneih zan a ni lo bawk - hun tawp thlengin goal dang a lut tawh lo a, Blasters an tlang.

ISL Semifinal
First Leg
March 11, Zirtawpni Zan
Jamshedpur 0 - 1 Kerala Blasters
KER: Sahal Abdul Samad 38'
March 12, Inrinni Zan
Hyderabad FC 3 - 1 ATK Mohun Bagan
HYD: Bartholomew Ogbeche 45+2'; Yasir Mohammad 58'; Javier Siverio 64'
AMB: Roy Krishna 18'

Second Leg
March 15, Thawhlehni Zan
Kerala Blasters 1 - 1 Jamshedpur FC
KER: Adrian Luna 18'
JAM: Pronay Halder 50'
Nizan Inkhel (Result kan hre hman lo)
ATK Mohun Bagan 7:30 PM Hyderabad FC
March 20, Pathianni Zan - Final
• Away goal rule hman a ni lo
• Inkhel pahnih belhkhawma go