Zarkawt Lords chak chiang

Mahuma Memorial 1st Division Screening Tournament khelh laiah, nimin khan inkhel pakhat awmin Zarkawt Lords chuan Legends lakah run 296 teh meuhin hnehna an chang a, table-ah pangana dinhmun an luah.

Suaka Cricket Ground, Sihhmuia inkhelah Zarkawt Lords hi ṭhum vawrah vannei zawkin vuak hmasak an thlang. Lalrinhlua'n ball 126 a hmachhawn aṭanga run 132 vaw chhuakin, over 50 chhungin a team hi run 348 a siampui.

Legends tan target a sang lua. Run 21 siamtu Ranjeer bak chu run 10 siam tling thei pawh an awm lo. Lords ball vawm thiam Raj Kumar Chhetri-a'n wicket ruk a lak bakah, Rinfela'n wicket nga a la bawk.

Thawhlehni inkhelah Chanmarians chuan Hunthar chu run 37 in an lo hneh tawh bawk. Chanmarians hian match ruk aṭangin vawi li hnehna an chang a, palina dinhmun an luah thung.

Vawiin hian a hmun ngaiah league round khelh chhunzawm a ni dawn. Chawhma dar 9:00-ah Gorkha leh Ramhlun Venglai te an inhmachhawn ang. League round hi March 23, Nilainiah khelh zawh tura ruahman a ni.