Benfica-in Ajax an pet chhuak

Darwin Nunez chuan minute 77-naah inkhela goal awmchhun a khung a, Benfica chuan Champions League last 16 aṭangin Ajax an pet chhuak - inkhel pahnih belhkhawmah 3-2 in an chak a, quarterfinal an lut.

Champions League last 16 first leg-ah team pahnih hi 2-2 in an lo inhnehtawk tawh a, away goal rule hman a nih loh avangin second leg boruak a sang hle.

Dutch club Ajax hi mahni muala inkhel tur an nih avangin dinhmun ṭha zawk angin an lang a, mahse, mikhual team Benfica zawkin an pet chhuak ta.

Ajax an vanduai
Dutch club-in khualmualah goal hnih an khung thei a, tun season Champions League-a goal kua khung tawhtu Sebastien Haller an neih tel bawk avangin an ngaih a ṭha - ngaihṭhatna awm tak pawh a ni.

Mahse, Ajax hi goal hmaah an vannei tawk lo. Striker chhuanvawr Haller chuan goal-a khungah inngai mah se goal khungna kawngah Dusan Tadic a lo offside a, Haller-a goal khung hi an pawm lo.

Johan Cruyff Arena-a inkhelah hian Antony a hmuhnawm a, mahse, kum 22 mi Ajax forward hian a team tan goal a khung thei bik lo - Brazil international hian a hun ṭha neih vawi hnih a hlah a, last 16 aṭangin Dutch club hi a tlakpui.

A tawpah Benfica
Mikhual team Benfica-in an mualah goal hnih an chhuah a, chhuah nawn an tum tawh lo - tlarhnung laiah Manchester City centre back hlui Nicolas Otamendi leh Ajax & Tottenham Hotspur defender Jan Vertonghen an ding a, Ajax player-ten paltlang an harsat.

Minute 77-naah ball chang tlem zawk Benfica-in goal an khung ta nge nge a, Alex Grimaldo-a freekick pet ṭha zet aṭanga ball kal chu Ajax goalkeeper Andre Onana tana dan rual lohin Darwin Nunez chuan a tauh lut.

Ajax-in goal an chhuah a tlai a, comeback turin an tan hun a tlem tawh - mikhual team an chak a, 2015-16 season hnua a vawi khat nan Champions League quarterfinal khel turin Benfica an inpet tling.

Mangṭha Ajax
Tun season European football-a team hmuhnawm ber pawl chu Ajax an ni a, Champions League last 16 pawh hi group stage match ruka chak vek chungin an lut - Sporting Lisbon, Borussia Dortmund leh Besiktas te vawi hnih ṭheuh an hmachhawn a, an hneh vek!

Champions League last 16-ah pawh Benfica laka chungnung tura ngaih an ni a, rin lawk ang ngeiin statistic thlir pawhin an chungnung. Mahse, a pawimawh ber goal an khung tlem zawk miau a, an tla.

Benfica tana goal awmchhun khungtu Darwin Núñez kha lo chhinchhiah rawh - kum 22 mi lek la ni mah se tun season-ah match 33 khelin goal 26 a khung der tawh a, assist vawi hnih a nei bawk. European club lianah kan hmu thuai ang.