UEFA Europa League ; Barcelona leh Sevilla tan fiahna hautak
European football inelna sang pahnihna Europa League quarterfinal lut turin Barcelona tan goal khung a ngai dawn a, champion hlui Sevilla tan last 16 paltlang turin mahni goal venhim a ngai thung - zaninah fiahna hautak an hmachhawn dawn.
Barcelona hi zanin dar 11:15-ah Galatasaray hmachawn turin NEF Stadyumu-ah an lenglut dawn. Nou Camp-ah team pahnih hi goal lut loin an inhnehtawk. Sevilla erawhin 1-0 a hmahruai chungin West Ham United an lenchilh thung ang.
Si thum faia Red Star Belgrade hnehtu Rangers chu tlang tura ngaih an ni. Sporting Braga, Atalanta leh Lyon ten first leg-a an hmahruaina an hum theih chuan an tlang bawk ang. RB Leipzig chu UEFA-in Russian club Spartak Moscow a paih avangin inkhel hah loin an tlang fel tawh.
Goal a ngai
Xavi-a'n a din thar leh hnuah Barcelona hian goal khung an harsat lo. Mahse, Galatasaray an mikhual ṭumin goal an khung thei tlat lo. Turkish club nen an inhnehtawk hnuah Osasuna 4-0 in an sawp thei a, thiam an la theihnghilh lo.
Barca tana match 600 khel tawh Gerard Pique chuan, "Result ṭha kan neih avangin fans pawh an hlim. Goal khung lohna match kan neih hnuah si li faiin hnehna kan chang thei a, season tawp thlengin result ṭha neih chhunzawm kan tum ang," a ti.
Ansu Fati, Sergi Roberto, Samuel Umtiti, Alejandro Balde leh Moussa Wague te chu hliam vangin an khel thei dawn lo, match khat an hrem hnuah Gavi erawh a lo kir thei tawh dawn. Spanish rawlthar hi midfield ti chaktu a ni thei ang.
Tlarhmaa Adama Traore, Pierre-Emerick Aubameyang leh Ferran Torres te an inkawp fuh leh a nih chuan goal khung an harsat lo ang. An match hnuhnung pakuaa tlawm nei lo Xavi naute hi chak tura rinkai an ni, first leg an khelh dan thlir erawh chuan result sawi lawk ngam a ni bik lo.
Galatasaray hian season an hmang ṭha lo. Super Lig-ah pawh 11-na dinhmun an luah hram a, an tan league aṭang chuan European football beisei ngam chi a ni tawh lo. Tun season Europa League-ah erawh an khelmualah tlawm an la nei lo, beisei an nei thiang.
London-ah Sevilla
Munir El Haddadi-a goal khat hmangin Sevilla hian West Ham lakah 1-0 in hma an hruai mek. Julen Lopetegui naute tan tlang turin goal venhim a tawk a, chutih rualin an inkhelhna tur hi London khawpui a nih tawh avangin Hammers hmachhawn an awlsam lo ang.
Sevilla hian Europa League nomawi vawi sarih an chawi tawh, an hlawhtlinna hi kum 2006 hnu lama mi vek a la ni zui. Kuminah hian an khelmual Ramon Sanchez Pizjuan-ah final khelh a ni dawn, mahni muala final khel turin West Ham paltlang hmasak phawt a ngai.
La Liga-ah hmahruaitu Real Maadrid an phak lohna point 10 a tling tawh a, chuvangin Sevilla tan Europa League hi kumina an nomawi beisei theih san a ni. Hliam vanga defender Marcos Acuna an chhawr thei lo tur erawh a hmun ruak hnawh khah dan an zawn a ngai dawn.
Premier League club zingah West Ham chiah hi Europa League-a dam awm an ni tawh. London club hian kum 40 chuang hnua a vawi khat nan nomawi chawi an duh a nih chuan zaninah an chak phawt a ngai, an hmabak erawh a awlsam dawn lo.
Hammers midfielder Tomas Soucek chuan, "Stadium khat tlatin min ṭantu an awm dawn, an puihna zarah goal pawh kan khung ngei ka beisei," tiin tlang tura inrintawkna an nei. Boruak sangah David Moyes a ṭha tawk em, tih chu kan hre dawn.
UEFA Europa League
Last 16 - Second Leg Fixtures
Red Star Belgrade 11:15 PM Rangers
Monaco 11:15 PM Sporting Braga
Bayer Leverkusen 11:15 PM Atalanta
Galatasaray 11:15 PM Barcelona
Lyon 01:30 AM Porto
Eintracht Frankfurt 01:30 AM Real Betis
West Ham United 01:30 AM Sevilla
Spartak Moscow CANC RB Leipzig
Last 16 - First Leg
Barcelona 0 - 0 Galatasaray
Sevilla 1 - 0 West Ham United
SEV: Munir El Haddadi 60'
Rangers 3 - 0 Red Star Belgrade
RAN: James Tavernier 11' (P)
Sporting Braga 2 - 0 AS Monaco
SPO: Abel Ruiz 3'; Vitor Manuel Carvalho Oliveira 89'
Atalanta 3 - 2 Bayer Leverkusen
ATA: Ruslan Malinovskyi 23'; Luis Fernando Muriel Fruto 25', 49'
BAY: Charles Aranguiz 11'; Moussa Diaby 63'