Quarterfinal-ah Halep a lut

Indian Wells last 16-ah Simona Halep a chak a, champion lai Paula Badosa leh French Open champion hlui Iga Swiatek te pawhin an khingpui ve ve hnehin quarterfinal an inhlangkai ve bawk.

Nimin zing inkhelah Romanian nula pahnih an intawng, world number 1 hlui Halep hian Sorana Cirstea chu 6-1, 6-2 in a hneh a, hnehna chang tur hian harsatna a tawk hran lo, set khatna la tur hian a khingpui tihsual zar a zo nasa ve bawk.

Season sarih liam ta khan Halep-i'n Indian Wells nomawi hi a lo chawi tawh, kuminah a sulhnu ngai chhui let theihna remchang a nei leh mek. Halep chuan, "Romanian player hmachhawn hi chu a boruak a danglam tlat ṭhin.

"Mahse, ka hma-chhawn tur player ka ngaihtuah duh lo a, nuam ti taka inkhel tawp turin court kha ka pan," a ti. Halep hian quarterfinal-ah chuan Petra Martic a hmachhawn leh ang, inkhel dangah Martic hian Ludmilla Samsonova chu 7-6 (6), 6-4 in a lo hneh ve thung.

Champion lai Badosa chuan quarterfinal lut turin Leylah Fernandez chu 6-4, 6-4 in a hneh a, kum 30 chuang hnuah hmeichhe player zinga Indian Wells title a zawna la thei hmasa ber nih a tum mek.

Kum 1990 leh 1991 khan Martina Navratilova chu a zawnin a champion, a hnu lamah a zawna champion leh thei an la awm lo. Spanish nula Badosa tan record nihrual leh turin match thum chak a la ngai.

Nimin zing inkhel dangah Swiatek chuan Angelique Kerber chu 4-6, 6-2, 6-2 in a hneh. Poland star hian a match hnuhnung pathumah set a hloh hmasa vek a, mahse huaisen takin a tho chhuak leh thei vek thung.

Kum 20 mi Swiatek hian Madison Keys a hmachhawn leh dawn. American nula Keys-i'n qualifier aṭanga in vaw kai Harriet Dart chu 6-1, 6-4 a hnehin Britain lamah a lo thawn haw ve bawk a ni.

Greek player Maria Sakkari chu inkhel hah lutuk loin a tlang, a khingpui Daria Gavrilova lakah 4-1 in hma a hruai mek a, set khat pawh an khelh zawh hmain a khingpui hi hliam vangin a inkhel zui thei lo.