Newcastle tan fiahna pawimawh a ni - Howe

Zanin dar 1:15 hian Goodison Park-ah Everton-in Newcastle United an mikhual dawn. Frank Lampard-a kaihhruai Toffees tan Premier League khel zel turin point hlawhchhuah a pawimawh a, neitu thar nei Magpies tan dinhmun fiahna a ni thei ang.

Newcastle boss Eddie Howe chuan, "Everton hi kan tan chuan fiahna pawimawh a ni a, chumi hmachhawn tur chuan kan inpeih. Tun hnaia kan khelh dan a lungawi thlak a, chutihrualin Toffees hian player ṭha tak an kawl avangin chak tur chuan kan ṭhat dan bera khelh a pawimawh ang," tiin a sawi.

Magpies hian nikum kum tawp lam khel ṭha lo mah se kuminah erawh match kua khel tawhin vawi ruk an chak a, vawi hnih an inhnehtawk a, an match hnuhnung berah an chak lo thung.

Howe enkawl tirhah Magpies dinhmun ṭha lo mah se kumina an chet ṭhat avangin an him ngei dawn niin a lang tawh. Everton erawh match hnuhnung pakuaah vawi riat an chak loh avangin point 22 an hmu a, table-ah 17-naah awmin an dinhmun a ṭha lo hle.