Nets tan Irving a tling tawk

Kyrie Irving-a'n Brook-lyn Nets tan a thiam thil a lantir. Nimin zing NBA regular season inkhelah Irving hian point 60 ngawt a nei, basketball inelna sang berah hian match khata point a neih hnem ber ṭum a tawng.

An player pawimawh Irving chet ṭhat zarah Brooklyn hian Orlando Magic chu 150-108 in an sawp. Nets tan Irving bakah player dang parukin point 10 chuang an nei thei a, quarter hmasa berah point 18 zeta sang fal nghalin an hawikir tawh lo.

Kum 29 mi Irving chuan, "Team tana tha thawhtu nih hi chu a nuam ṭhin. Ka tan chuan hun chhinchhiah tlak bik a ni," a ti. A teammate Kevin Durant chuan Irving chu theihna nei sang leh mi bik a nih thu a sawi bawk.

Kevin Durant awmna Nets hian tun season-ah vawi 36 hnehna an chang ta chiah. Western Conference table-ah pariatna niin, an hnuaia awm Atlanta Hawks aiin match hnihin an chak hnem - playoff khel turin an dinhmun an sawhnghet zel.

Inkhel dangah Memphis Grizzlies chuan Indiana Pacers 135-102 in an hneh a, tun hnaiah a zawnin vawi li an chak ta. Western Conference table-ah pahnihna niin, hmahruaitu Phoenix Suns hnungzuiin playoff an khel ngei ang.

Bench aṭanga lut Tyler Herro-a point 29 neih hmangin Miami Heat chuan Detroit Pistons chu 105-98 in an hneh a, playoff khel tura tling tawh Phoenix Suns chuan New Orleans Pelicans 131-115 in an hneh ve bawk, an dinhmun ṭha tawh mah se an inthlahdah chuang lo.