Leicester tan hmingchhia thai reh hun

Brendan Rodgers-a Leicester City-in tun season-a beisei an phak lohzia inhrilh nawn a ngai lo a, Foxes tan an hmingchhe lutuk tur thupna ṭha ber chu Europa Conference League a ni.

Leicester City hian zanin dar 11:15-ah Europa Conference League last 16 second leg khel turin Rennes an lenchilh dawn a, French club hi first leg-ah 2-0 a an lo hneh tawh avangin tlang tura ngaih an ni.

Zanin ECL last 16 inkhel ngaihven hlawh dangah AS Roma an inlan dawn bawk a, Jose Mourinho enkawl club hian zanin dar 1:30-ah Vitesse an mikhual dawn - first leg-ah khan 1-0 in Roma an lo chak tawh.

Europe Beiseina
Foxes-in theihnghilh atana duhawm tak season an hmang mek. League Cup-ah quarterfinal aṭangin an tla a, FA Cup aṭangin fourth round-ah an tla a, Premier League-ah 12-na a ni mek bawk - an season a ropui lo hle.

A tawi zawnga sawi chuan Foxes hian ECL nomawi an chawi a nih loh chuan season tharah European football an khel dawn lo tih a chiang tawh a, ECL-ah an champion a nih erawh Europa League an khel thei dawn thung.

Rodgers-a tan pawh he nomawi chawi hi a hmingchhe lutuk tur thupna a ni ang a, nipui transfer-a player ṭha hip turin European football sawi rik tur a neih a ngai bawk - Foxes tan champion a ṭul a, mahse, quarterfinal luh phawt an la mamawh!

Inlan tur
Foxes tan tlang turin zaninah goal khat aia tam chhuah loh a tawk a, Arsenal laka chak lo squad aṭangin Rodgers-a'n player a siksawi nual tura ngaih a ni.

Jamie Vardy chu hliam vangin a la inlan thei lo tura ngaih a ni a, English striker-in hliam vanga match a khel tam lo chungin tun season-ah goal 12 a khung tawh a, Foxes player zingah ani aia khung hnem an awm lo!

Foxes tan Zambian striker Patson Daka leh Harvey Barnes te hoin mawhphurhna lak thiam a ṭul tihna a ni a, RB Leipzig aṭanga loan hmanga an hawh Ademola Lookman tan pawh theihna tak tak pholan a hun tawh.

Fimkhur a ngai
Foxes-in first leg-a an chak tawh avanga thlamuang taka France an pan a nih chuan an tisual ang - an hmachhawn tur Rennes hi Leicester laka 'comeback' tur khawpin an ṭha tawk a, chumi hrilhfiahna awlsam ber chu tun hnaia an result a ni.

Rennes hian an league match hnuhnung paliah hnehna an chang vek a, goal 14 ngawt an khung! An lamah goal nga a lut thung a, 4-2 a French club ṭha Lyon hneh hlim club hian Foxes lakah goal hnih aia tam an khung thei tih inhre chungin an khel dawn.

Tlarhmaah hian tun season-a goal 14 khung tawh Martin Terrier leh goal 16 khung tawh Gaetan Laborde an nei a, Foxes tlarhnung tan fimkhur taka khelh a finthlak ang.

Roma inlan hun
AS Roma-in zanin dar 1:30-ah Vitesse an mikhual dawn a, 1-0 a an lo hneh tawh team lakah goal chhuah loh chu quarterfinal lut turin a tawk - Roma hi an league match hnuhnung pariatah an tlawm miah lo a, mahse, match li hi an draw thung.

Hriat tel atana ṭha chu, Serie A club enkawltu hi Jose Mourinho a ni a, Portuguese coach hian inelna a hmachhawnah chuan nomawi chawi zel a duh - tun season-ah nomawi an beisei theihna chu ECL hi a ni.

Roma hian tlarhmaah tun season-a goal 20 khung tawh Tammy Abraham an nei a, midfielder Lorenzo Pellegrini hian match 27-ah goal 10 khunga assist vawi nga a neih tawh avangin Vitesse tan chuan ven bik a ngai ang.

Europa Conference League
Round of 16
March 10, Ningani Zan - First Leg
PAOK FC 1 - 0 K.A.A. Gent
PAO: Jasmin Kurtic 58'
Vitesse 0 - 1 AS Roma
ROM: Sérgio Oliveira 45'
Slavia Prague 4 - 1 LASK
SLA: Yira Sor 3', 29'; Peter Olayinka 82'; Ibrahim Traoré 85'
LAS: Husein Balic 67'
Partizan 2 - 5 Feyenoord
PAR: Bibars Natcho 13'; Nemanja Jovic 46'
FEY: Jens Toornstra 20', 77'; Cyriel Dessers 51'; Lutsharel Geertruida 64'; Luis Sinisterra 71'
Marseille 2 - 1 FC Basel
MAR: Arkadiusz Milik 19' (P), 68'
BAS: Sebastiano Esposito 79'
Leicester City 2 - 0 Rennes
LEI: Marc Albrighton 30'; Kelechi ?heanach? 90'
PSV Eindhoven 4 - 4 FC Copenhagen
PSV: Cody Gakpo 21', 70'; Ritsu Doan 50', Eran Zahavi 85'
FCC: Ísak Jóhannesson 6'; Pep Biel 22', 78'; Lukas Lerager 43'
Bodø / Glimt 2 - 1 AZ Alkmaar
BOD: Amahl Pellegrino 39'; Ola Solbakken 90' (P)
AZA: Zakaria Aboukhlal 73'

Zanin Inkhel Tur - Second Leg
FC Basel 11:15 PM Marseille
Rennes 11:15 PM Leicester City
FC Copenhagen 11:15 PM PSV Eindhoven
AZ Alkmaar 11:15 PM Bodø / Glimt
AS Roma 01:30 AM Vitesse
Gent 01:30 AM PAOK
LASK 01:30 AM Slavia Prague
Feyenoord 01:30 AM Partizan