I League club-te an intluk tawk

Nimin tlai I League inkhelah hmahruaitu Mohammedan SC-in table hnuai lama awm Churchill Brothers lakah 1-2 in a tlawm. Kolkata club hian an match hmasa paliah hnehna chang vek mah se inkhel result hian an ṭha fal bik lo tih a nemnghet

Kalyani Stadium-a inkhelah Churchill tan Kenneth Ikechukwu-a'n minute hnihna lekah goal a khung a, Mohammedan-in striker che ṭha tluang Marcus Joseph hmangin minute 57-naah an sut.

Goan club tan Ikechukwu-a'n minute 63-naah goal hnihna a khung a, chakna goal a ni nghal bawk. Churchill tan an vawi khat chakna a ni a, Mohammedan erawh an vawi khat point hlohna a ni thung.

Nimin tlai inkhel dangah Rajasthan leh Indian Arrows te goal awm loin an inhnehtawk. March 15, Ningani khan Nercoca leh Real Kashmir te 3-3 in an inhnehtawk a, Sreenidi Deccan-in RoundGlass Punjab 2-1 in an hneh ve bawk.