AS Roma an ṭha - Blaise Matuidi

Pathianni zan dar 1:15 hian Italian champion Juventus chu Serie A match khel turin AS Roma khelmualah an lenglut dawn a, midfielder Blaise Matuidi chuan an khingpui tur Roma chu point hloh theihna an nih thu a sawi.

Season kal laiah Juve leh Inter Milan ten point 45 ve ve nei tawhin a chungah an awm, palina Roma hian point 35 an nei thung - Champions League khelh tum an nih avangin mahni khelmuala point hloh ngawt a fuh bik lo ang.

Juve midfielder Matuidi chuan, "Roma hi team ṭha tak an ni, keimahni ang bawkin an tlarhma an hlauhnawm hle. A bik takin an fans nen an thawkho ṭha a, keini lam chuan inkhel harsa tak hmachhawn kan inrin a ngai," tiin a sawi.

France international Matuidi hi kum 32 mi ni tawh mah se manager Maurizio Sarri-a'n a la ringtawk hle a, tun season league match 18 an khelh tawh zinga 16 zetah a inlan - Turin club tan player pawimawh berte zinga mi a la ni reng.

Juve hian Cristiano Ronaldo an neih avangin tun hma zawng aiin khawvel ngaihven an hlawh zual a, tun season aṭangin Antonio Conte-a'n Inter Milan a enkawl avangin Juve leh Inter inel boruak a sang. AC Milan tan Zlatan Ibrahimovic a kir leh tawh avangin Serie A in ngaihven a hlawh thar leh mek.