Arsenal ngamtu Liverpool-in City an hnaih

January 16-a Liverpool-in 3-0 a Brentford an hneh khan hmahruaitu Manchester City chu point riatin an la thlau cheu a, coach leh player huaisen bik lo tan chuan champion la beisei ṭalh kha thil âtthlak a ni.

Mahse, Reds-in coach atan Jurgen Klopp an nei a, German coach hian, "Kan lam ṭang i nih chuan kan zin kawng hi nuam ti takin min zawhpui ang a, engkim beisei chungin kan kal ang - kan thlen theih sang ber thlen kan duh a ni," a ti.

Jurgen Klopp-a'n thu ropui tak tak a sawi ṭhin a, a danglamna chu khelmualah a thusawi hi a tak ram a chantir ṭhin - Nilaini zan khan Liverpool chuan league match khel turin Arsenal an lenchilh a, khualmualah Gunners hi 2-0 in an hneh.

Liverpool tan Diogo Jota leh Roberto Firmino ten goal khat ve ve an khung a, hmahruaitu City chu point khat chauhin an thlau ta a, an khelh zat a inang - Etihad Stadium-ah an la intawng leh dawn tih theihnghilh lo la.

Reds an vannei
Arsenal hi Anfield-ah 4-0 in an lo tlawm tawh a, League Cup quarterfinal aṭangin Liverpool hian an lo pet chhuak tawh bawk - Gunners tan phuba lak hun a ni a, Champions League khelh an tum bawk avangin an tan inkhel pawimawh a ni.

Gunners hian Liverpool lakah tlarhnung vengtu ringawt nih bik tum loin huaisen takin an bei a, mahse, goal hmaah an hriam tawk lo a, an vannei tawk lo bawk - danglamna langsar tak erawh player 'quality' a inthlau hret.

Liverpool tan midfielder thiam bik Thiago Alcântara a chesual a, a back pass sual dawngtu Alexandre Lacazette chuan Martin Odegaard tan a siamsak a, Norwegian midfielder hian Reds keeper Alisson chiah hmachhawn mah se Brazil international hian a lo dansak a, keeper ṭha bik a nih chhan a lo pholang.

First half-ah team pahnihin goal an khung lo a, minute 54-naah Jota-a'n goal hmahruai a khung - Portuguese forward hian tun season-ah match 38 khelin goal 18 a khung ta a, assist vawi thum a nei bawk.

Thutlukna fing
Inkhel a rei tawlh tawlh a, coach ṭha bik danglamna a lang - Klopp-a'n minute 56-naah Jota leh Luis Diaz a la chhuak a, hliam damkawr pahnih Firmino leh Mohamed Salah a luhtir.

German coach thutlukna a fuh tawk tih lantir turin Reds-in hun an mamawh rei lo. Andrew Robertson-a thawhrim zar zoin Firmino chuan Reds goal hnihna a khung a, hun tawp thlengin goal dang a lut tawh lo.

Kum 30 mi Firmino hian tun season inelna hrang hrangah match 25 aṭangin goal kua a khung a, assist vawi li a nei bawk - Brazilian forward hian sawiselna tawk ṭhin mah se a hun takah a rah leh ṭhin.

Firmino goal khung theih chhana fak phu chu Klopp a ni - Jota la chhuak tura thutlukna a siam laiin Portuguese forward-in goal a khung a, coach tam tak ni se la chhuak loin an khelh zuitir ang. German coach erawh a game plan-ah a chiang a, goal a khung aṭanga minute hnihnaah Jota a la chhuak lui a, Firmino-a'n thutlukna huaisen tak siamtu a pu lawmna a thlen.

Laipui a tlawlh
Arsenal an khel ṭha a, a bik takin Gabriel Martinelli chu hmuhnawm khawpin a khel - goal an chhuah hnua a chance neih duhawm goal-a a chantir lohte chu uiawm a tling a, a bik takin hahdam taka Trent Alexander-Arnold awm theih loh chhan a ni.

January transfer-ah mahni thu duh ve tak, Arsenal boss Mikel Arteta-a'n Pierre-Emerick Aubameyang chu a nungchang avangin a thlawnin a chhuahtir a, mahse, Gabonese striker thlaktu tur a la lo.

Auba hian Barcelona-ah match kua aṭangin goal ruk a khung leh der tawh a, Arsenal-in Liverpool lakah Auba la kawl se, inkhel a danglam ang em, tih chu zawhna awm thei a ni.

A tawi zawnga sawi chuan Gunners-in striker class sang an mamawh tih a lang a, nipui transfer inhawn ruala an melh hmasak ber atan striker an dah a ṭul.

Champion zia
Liverpool-in an game ṭha ber an khel lo tih chu inkhel entuten an hrechiang - a bik takin chawlhlawk hma minute 45 phei kha chu Reds fans tam tak an hlauthawng ru ngeiin a rinawm.

Mahse, team ṭha danglamna chu an khelh ṭhat loh niah pawh an ṭang tlat thei ṭhin hi a ni a, khelh ṭhat loh zanah pawh team ṭha laka 2-0 a an chak theih avangin Liverpool hi an ngaihtuahawm lo riau!

Khelh ṭhat loh zan pawha chak thei hi, 'Champion zia' tia an sawi ṭhin kha a ni a, Reds-in beisei an phak loh zanah pawh goal hnih an khung a, an lamah a luh loh bawk avangin inrintawkna an neih belh ang.

Liverpool hian tun season-ah League Cup an chawi tawh a, FA Cup leh Champions League-ah quarterfinal an lut tawh bawk - season khata nomawi pali chawi thei dinhmunah an ding a, harsa dawn mah se an squad enin 'thil theih loh' tia sawi erawh a rem lo.

An inthlau
Arsenal squad en ila, ram langsar tana inlan phak sawi tur an awm mang lo - Liverpool erawh bench aṭanga Salah leh Firmino luhtir theitu an ni a, a tawi zawnga sawi chuan Gunners hi Liverpool 'level' ah an la awm lo.

Tun season-ah Liverpool nena league match hnih an khelhah an tlawm ve ve a, Reds-in goal ruk an khung laiin an chhanglet ve miah lo thung - Carabao Cup semifinal-ah Reds hian 2-0 in an pet chhuak bawk a, Arsenal hian tun season-a Liverpool an hmachhawn vawi thumah goal an khung miah lo tihna a ni.

Hei chauh a ni lo - Manchester City an inkhelhpui vawi hnihah a tlawm zawkah an ṭang ve ve a, Chelsea leh Manchester United chu vawi khat ve ve khelhpui tawhin an tlawm ve ve bawk!

Arsenal hian league table-ah palina dinhmun erawh an la luah tho a, chutihrual chuan anmahni ang thoa Europe-a inlan tum Manchester United, West Ham leh Tottenham Hotspur ten top four an beisei ve reng avangin fimkhur a ṭul ang.

Emirates Stadium-a lenluh a, Arsenal hneh theih chu thil nuam bik a ni a, kan chak dan khan min tilawm lehzual. Bul kan ṭan ṭha a, mahse, a hnu lawkah game a rawn inhawng a, second half-ah khan hmasawn tumin kan khel a ni. Ka team avang leh kan dinhmun mek avang hian ka phur a, chuvang chuan engkim a danglam ta tihna erawh a ni lo. Kan mamawh chu ke pen zel a ni a, kan match khelh tura hnehna chang chung zela kan hun tawn hlim taka hman zel hi kan duh a ni. - Jurgen Klopp, Liverpool manager

Kan ruahman angin kan khel a, mahse, box chhungah kan talbuai ta ṭhin a ni ber. Box chhunga beisei kan phak loh avangin kan tlawm a ni - ka naute khelh danah ka lawm a, result hi kan inkhel hrilhfiah nan a tling tawk loah ka ngai. Liverpool kha box chhungah an rawn che fuh a, vawi hnih ngawt kan goal net an rawn tawn puar thei a ni. - Mikel Arteta, Arsenal manager