Khelmual chhungah Chelsea an buai lo

Chelsea-in Nilaini zan khan Stade Pierre-Mauroy-ah Lille 2-1 in an hneh a, tun season Champions League last 16-ah mahni mual leh khualmuala chak ve ve thei awmchhun an ni.

French champion Lille hian Burak Yilmaz penalty hmangin minute 38-naah an khung hmasa a, Chelsea-in Christian Pulisic leh Cesar Azpilicueta te hmangin second half-ah an chhanglet. London club hi aggregate-ah 4-1 in an chak a, European club ṭha pariat zingah an inhlangkai.

Buaina karah
Russia-in Ukraine a run a, football club zinga tuar na ber chu Chelsea an ni. UK sorkarin Blues neitu Roman Abramovich chu a sum neihte khawih che thei lo turin an hrek.

London club hi an sum hman tur zat bituk sak thlap an ni a, chutihrualin Lille nena an inkhelhna tur zin vei vahna hi hremna an tawh hmaa an chinfel avangin coach leh player te thlawhtheihna hmangin an kal theih phah.

Club sponsor-tu Three chuan Chelsea nen an inremna an titawp a, kawr hmaa an logo '3' pawh la thla turin an ngen tawh. Blues erawhin Three logo hi an la la thla lo.

Chelsea hian neitu thar an neih thuai a rinawm a, lei tumtu pawh an ṭhahnem hle. Blues hian neitu thar an chinfel vat loh chuan buaina neih belh thei dinhmunah an ding.

Abramovich hi Russian president Vladimir Putin nena inhnim hnai tak a ni a, European Union thutlukna a zirin UEFA pawhin Champions League-a Chelsea khelh zel dan tur an ngaihtuah a ṭul dawn a ni.

An buai lo
Lille-in beiseina nei chungin bul an ṭan a, entu an ṭhahnem bawk avangin inkhel a nung ṭha. French club tan VAR a pawimawh a, ball-in Jorginho kut a per avangin penalty an hlawh. Burak Yilmaz rawn pen chhuakin kawh zetin a pet goal lo.

Chelsea an buai phah lo a, game mawi an la lantir. First half injury time-ah Jorginho pass mawi zet chu Christian Pulisic-a'n angle zim tak aṭangin mawi zetin a khung.

Lille an vanduai a, Portuguese midfielder Xeka-a'n goal ban a tauh per. Chelsea erawhin hun ṭha an bawh pelh lo a, kil tina ball an in pass kual hnuah Mason Mount cross chu Azpilicueta-a'n goal-ah a chantir. English club zawkin an nawr chhunzawm a, goal erawh an khung belh tawh lo.

Eng nge an sawi?
Chelsea manager Thomas Tuchel chuan, "Hruaitu atana duhthusam a ni a, a tih tur hi hun nuam leh hrehawmah a ti vek. Hun harsa tam tak a tawk a, khelh tam loh laite a nei a, wing back anga khelh a ṭul pawhin a khel mai. Chelsea captain a nihna angin a tih tur a ti zel. Tunah pawh legend chu a ni der tawh," tiin chakna goal khungtu Azpilicueta a fak.

German manager Tuchel chuan sawi chhunzawmin, "Quarterfinal-ah club dang zawng zawng tum hreh nih kan duh. Chu chu kan nihna pawh niin ka hria. Khawvela league harsa berah a sang palia awm phak kan inchuh a, Europe-ah team ṭha pariat zingah kan tel. Hun harsa hian kan theihna min pholantir a ni," tiin a sawi.

Blues hian March 19, Inrinni zan hian Middlesbrough nen Riverside Stadium-ah FA Cup quarterfinal an khel leh ang.

UCL Last 16
First leg
February 15, Thawhlehni
Paris Saint-Germain 1–0 Real Madrid
PSG: Kylian Mbappe 90+4'
Sporting Lisbon 0–5 Manchester City
MAN: Riyad Mahrez 7'; Bernardo Silva 17', 44'; Phil Foden 32'; Raheem Sterling 58'
February 16, Nilaini
RB Salzburg 1–1 FC Bayern Munich
RBS : Chukwubuike Adamu 21'
FCB : Kingsley Coman 90'
Inter Milan 0–2 Liverpool
LFC : Roberto Firmino 75'; Mohamed Salah 83'
February 22, Thawhlehni zan
Chelsea 2–0 Lille
CHE: Kai Havertz 8'; Christian Pulisic 63'
Villarreal 1–1 Juventus
VIL: Dani Parejo 66'
JUV: Dusan Vlahovic 1'
February 23, Nilaini zan
Atletico Madrid 1–1 Manchester United
ATM : Joao Felix 7'
MNU : Anthony Elanga 80'
Benfica 2–2 Ajax
BEN : Sebastien Haller 26' (OG); Roman Yaremchuk 72'
AJX : Dusan Tadic 18'; Sebastien Haller 29'
Second Leg
March 8, Thawhlehni Zan
Bayern Munich 7–1 Red Bull Salzburg
BAY: Robert Lewandowski 12' (P), 21' (P), 23'; Serge Gnabry 31'; Thomas Müller 54', 83'; Leroy Sané 85'
RBS: Maurits Kjærgaard 70'
Agg-ah Bayern 8-2 in an chak
Liverpool 0–1 Inter Milan
INT: Lautaro Martínez 61'
Agg-ah Liverpool 2-1 in an chak
March 8, Nilaini zan
Real Madrid 3–1 PSG
RMA : Karim Benzema 61', 76', 78'
PSG : Kylian Mbappe 39'
Agg-ah Real Madrid 3-2 in an chak
Manchester City 0–0 Sporting Lisbon
Agg-ah Manchester City 5-0 in an chak
March 15, Thawhlehni zan
Manchester United 0 - 1 Atletico Madrid
ATM : Renan Lodi 41'
Agg-ah Atletico 2-1 in an chak
Ajax 0 - 1 Benfica
BEN : Darwin Nunez 77'
Agg-ah Benfica 2-1 in an chak
March 16, Nilaini Zan
LOSC Lille 1 - 2 Chelsea
LIL : Burak Yilmaz 38' (P)
CHE : Christian Pulisic 45+3'; Cesar Azpilicueta 71'
Agg-ah Chelsea 4-1 in an chak
Juventus 0 - 3 Villarreal
VIL : Gerard Moreno 78' (P); Pau Torres 85'; Arnaut Danjuma 90+2' (P)
Agg-ah Villarreal 4-1 in an chak