Bagan chak mah se ISL final an ban phak lo!

Indian Super League semifinal second leg-ah 1-0 in ATK Mohun Bagan chak mah se final an khel dawn lo - Kolkata club hian first leg-ah 3-1 in Hyderabad FC an lo ngam lo tawh a, inkhel pahnih belhkhawmah 3-2 in an tlawm.

Bagan tan Roy Krishna chuan inkhela goal awmchhun a khung a, Hyderabad-in chhanglet thei lo mah se hun tawp thlenga goal dang an chhuah loh avangin an tlang a, final an lut - Hyderabad-ah hian keeper Lalbiakhlua Jongte leh midfielder Mark Zothanpuia an awm a, an la nau deuh avangin hmun pawimawh erawh an chang phak lo a, Bagan lakah pawh an inlan lo.

Semifinal lehlama Jamshedpur hnehtu Kerala Blasters chuan Thawhlehni zan khan ISL final an lo lut tawh a, Pathianni zan dar 7:30-ah Hyderabad leh Blasters ten Indian champion nih an inchuh dawn.

Bagan beiseina
Mohun Bagan boss Juan Ferrando-a'n si hnih an phur sa tih a hai bik lo a, Hyderabad lakah attacking game khelh tumin a player-te a rem a, 3-5-2 formation-ah rin loh takin Roy Krishna kawppui turin Kiyan Nassiri a dah lut.

Tlarhnungah Pritam Kotal, Sandesh Jhingan leh Subhasish Bose te a inkawptir a, mual sir aṭanga nawr turin Prabir Das leh Liston Colaco a dah a, midfield laiah Carl McHugh, Hugo Boumous leh Joni Kauko a dah.

Hetihlai hian Hyderabad boss Manolo Márquez tan erawh fimkhur taka inrem chu thutlukna fin thlak zawk a ni a, 4-2-3-1 formation rawn hmangin, tlarhmaah Javier Siverio a mal tlat tir a, a hnung chiahah a thlawp turin Bartholomew Ogbeche dah a ni thung.

A harsa
Bagan-in attacking game khelh tum mah se an duh angin an nawr thei lawk lo a, insiamrem turin hun an duh rei - minute 22-naah penalty an beisei a, pek an ni lo.

Hugo Boumous-a corner aṭanga ball kal chuan Ogbeche banah a fuh a, penalty ni ngei turin a lang. Mahse, ISL-ah video assistant referee hman a la ni ve lo a, referee thutlukna awmsaah innghah a ṭul - Bagan an vanduai takzet.

Minute 31-naah Liston Colaco chuan Kolkata club tan goal hmahruai khungna remchang a nei a, mahse, Hyderabad keeper Laxmikanth Kattimani chuan ṭha zetin a dansak.

Penalty bawk
Colaco chance hlah hnu lawkah Aniket Jadhav chuan Hyderabad tan chance nei mah se, corner aṭanga ball kal chu ven loha a awm chungin a chhawr thei lo.

First half-ah Bagan-in chance an nei nual - Kolkata club tana Prabir-a cross duhawm chu season khata nuai 250 vel hlawhtu Boumous chuan goal-ah a chantir thei lo.

Minute 40-naah Bagan hi penalty chawi ngei tur niin an lang ve leh a, mahse, Jadhav laka foul Kiyan-a'n referee zahngaihna a dawng a, penalty a chawi lo hlauh -a lawm khawp ang.

A tawk lo
First half-ah goal a lut lo a, chawlhlawk hman hnua nawrtu pawh Bagan bawk an ni. Mahse, Hyderabad tan keeper Kattimani a che ṭha a, minute 50-naah Krishna khung ngei tur nia lang chu a dang.

Prabir Das-a corner aṭanga ball kal chu Joni Kauko-a'n a khung ngei dawn niin a lang a, mahse, Hyderabad lamin goal line aṭangin an lo pet chhuak leh hman bawk.

Minute 79-naah Bagan-in goal an khung ta nge nge a, Colaco-a siamsak chu Krishna chuan goal-ah a chantir - mahse, a goal khung a tlai hret a, goal dang thawk chhuak turin Kolkata club tan hun a tam tawk tawh lo.

Bagan an vanduai
ISL semifinal-ah uiawm takin Bagan an tla a, match official puh tur an neih tel avangin an ui lehzual ang - penalty ngei tur pek an ni lo a, Krishna-a'n an goal hnihna khungna remchang a neih chu offside an phar bawk.

Fijian striker hian minute 84-naah goal khungna remchang a nei - a ball hmuh ṭha tak chu a awmin a la thla a, shot tura a insiamrem laiin offside phar a ni.

Krishna chance hi replay en chuan offside lo niin a lang a, Kolkata club hian, "Thutlukna siam sual pahnih kan tuar a ni," ti pawhin sawi se, an thusawi ṭawmpuitu an tam khawp ang.

ISL Semifinal
 First Leg
March 11, Zirtawpni Zan
Jamshedpur 0 - 1 Kerala Blasters
KER: Sahal Abdul Samad 38'

March 12, Inrinni Zan
Hyderabad FC 3 - 1 ATK Mohun Bagan
HYD: Bartholomew Ogbeche 45+2'; Yasir Mohammad 58'; Javier Siverio 64'
AMB: Roy Krishna 18'

 Second Leg
March 15, Thawhlehni Zan
Kerala Blasters 1 - 1 Jamshedpur FC
KER: Adrian Luna 18'
JAM: Pronay Halder 50'
*Semifinal pahnih belhkhawmah 2-1 in Blasters an chak

March 16, Nilaini Zan
ATK Mohun Bagan 1 - 0 Hyderabad FC
AMB: Roy Krishna 79'
*Semifinal pahnih belhkhawmah 3-2 in Hyderabad an chak

March 20, Pathianni Zan - Final
Hyderabad FC 7:30 PM Kerala Blasters

*ISL semifinal-ah away goal rule hman a ni lo.