Villarreal-in Juventus an pet chhuak

Champions League-ah Villarreal-in team ṭha leh sulhnu nei lian zawk Juventus chu khualmualah 3-0 in an hneh a, Europe team ṭha pariat zingah an inhlangkai. Unai Emery hote hian season liam ta khan Europa League nomawi chawi turin final-ah Manchester United an hneh a, Champions League khelh theihna ticket neiin tunah chuan Italian club lian Juve an pet chhuak hial.

Allianz Stadium-a inkhelah goal hmuh tur a awm lawk lo a, first leg-ah 1-1 a an inhnehtawk avangin inkhel boruak a sang hle. Yellow Submarine-in minute 78-naa Gerard Moreno penalty hmangin hma an hruai a, Pau Torres leh Arnaut Danjuma penalty hmanga khung belhin 3-0 in an chak.

A hmuhnawm
Juve-in bul an ṭan ṭha a, hnai tak aṭanga Álvaro Morata ball tauh chu Villarreal keeper Gerónimo Rulli-a'n a dang. Serbian forward ṭha mi Dusan Vlahovic pawhin crossbar a tih per a, Villarreal an vannei.

First half-ah Old Lady an chungnung a, keeper Rulli-a'n ṭha takin Vlahovic-a tauh goal tur a dang. Chutihrualin Tottenham aṭanga loan hmanga Villarreal zawmtu Giovani Lo Celso-a'n box pawn aṭangin goal pawnah chiah a pet ve bawk.

Second half-ah pawh Juve-in goal chance nei hmasa mah se Arsenal player hlui Francis Coquelin-a'n Daniele Rugani lakah penalty a hlawh chhuak. Gerard Moreno rawn pen chhuakin minute 78-naah hmahruaina goal a khung.

Goal khat an chhuah hnuah Juve an talbuai a, Villarreal an che ṭha zui. Spanish club tan Pau Torres-a'n corner aṭanga ball kal chu minute 85-naah a pet goal. Yellow Submarine an phur zel a, injury time-ah Matthijs De Ligt kutin ball a per vanga an penalty hmuh chu Arnaut Danjuma-a'n chiang takin a pet goal.

Lawm leh lawm lo
Villarreal defender Pau Torres chuan, "Kan duh danin thil a thleng. Bench-ah player kan nei ṭha a, hun rei tak inkhelh kha kan cho a ni. Chutihrualin ruahmanna duhthusam pawh siam ila, 3-0 a chak inbeiseina kan nei lo. Keeper Rulli a che ṭha a, kan vannei tel bawk," tiin a sawi.

Spanish defender Torres sawi ang hian subsitute player-ten danglamna an siam a, bench aṭanga lut Moreno leh Coquelin te an chakna kawngah an pawimawh hle.

Villarreal manager Unai Emery chuan, "Chak tur chuan kan keeper a chet ṭhat a ṭul dawn tih kan hria a, kan hun ṭha neih hman ṭangkai a ṭul bawk. First half-ah khan team ṭha zawk an ni a, second half-ah pawh a ni tho. Mahse game plan an nei a, Gerard-a'n a theihna a rawn lantir bawk," tiin a sawi a, quarterfinal-ah eng team pawh hmachhawn se an inpeih thu a sawi bawk.

Juventus manager Massimiliano Allegri chuan, "Villarreal kha team danglam tak an ni a, an hun ṭha neih kha an hmang ṭangkai hle. Kan result avangin pawi kan ti a, a chhan chu first leg leh second leg-ah chakna chance kan neih ve ve vang a ni," tiin a vanduai thu a sawi.