Bahrain Grand Prix-ah Vettel tlan thei dawn lo

World champion vawi li ni tawh Sebastian Vettel chu Covid-19 a kai avangin season thar atana F1 intlansiak hmasa ber 'Bahrain Grand Prix' ah a inlan thei dawn lo.

Bahrain Grand Prix hi March 20, Pathianni aṭanga tlan ṭan tur a ni a, Aston Martin driver Vettel aiah hian Nico Hulkenberg a inlan ang. McLaren driver Daniel Ricciardo pawh Covid-19 vang thoin kar liam taa Bahrain-a neih final test-ah a inlan thei lo a, amaherawhchu Australian driver hi a negative tawh avangin inelna takah a tlan thei dawn.

Kum 34 mi Hulkenberg hi kum 2019 aṭang khan permanent driver a ni tawh lo a, midang aiawh erawhin a la inlan ṭhin. German driver Hulkenberg hi kum 2020 khan vawi thum a inlan a, Covid-19 vanga tlan thei lo Sergio Perez leh Lance Stroll te aiah a tlan a ni.