Rilru chhia ka pu lo - Smart

Nimin zing khan Boston Celtics chuan Golden State Warriors chu 110-88 in an hneh a, Stephen Curry a inhliam. Warriors thiampuipa Curry hliamtu Smart chuan tih hliam tum vang ni loin vanduai vang a nih thu a sawi.

Smart hi ball chan tumin a 'dive' a, Curry ke a sut avangin Warriors star hi second quarter lekah a inhliam. Warriors coach Steve Kerr chuan, "Marcus kha a dive khan Curry khup a su a, chu chu ka lungawi lohna chhan a ni. Khelh dan hlauhawmah ka ngai a, hrem ngei turah ka ngai," tiin a sawi.

Kerr thusawi hi Smart hian a ṭawmpui lo a, kum 28 mi Celtics guard chuan, "Kei leh Steve hi USA tana kan khelh ho tawh avangin mi tih nat ka tum lo tih chu a hria ang a, rilru chhia ka pu lo, tih pawh a hria ang. Curry kha ka hmu lo a, ball chan tumin ka dive. Inhliam an awm kha pawi ka ti a, a dam thuai ka beisei," tiin a sawi.

Inkhel dangah Dallas Mavericks chuan match li chak zawn tawh Brooklyn Nets chu hun tawp hmaa Spencer Dinwiddie 3-points hmangin 113-111 in a hneh.

Giannis Antetokounmpo-a'n point 36 a nei a, Milwaukee Bucks-in Sacramento Kings chu 135-126 in an hneh. Philadelphia 76ers tan Joel Embiid a che ṭha a, a kum 28 pianchamah 35 points neiin Cleveland Cavaliers chu 118-114 in an hneh bawk.