Kane-a'n nomawi chawi a phu - Conte

Tottenham Hotspur chuan Nilaini zan khan khualmualah Brighton & Hove Albion 2-0 in an hneh a, season thara Champions League khelh beiseina an chhi nung zel. Spurs hi point 48 hmuin Premier League-ah pasarihnaah awm mek mah se palinaa awm Arsenal chu point thum chauhin an pha lo.

Amex Stadium-a inkhelah hian Spurs an hmuhnawm a, Kane-a'n a chance neih ṭhat hmasak a hlah. Antonio Conte hote an talbuai phah lo, minute 37-naah Cristian Romero-a'n Dejan Kulusevski siamsak chu box pawn aṭangin a khung.

Second half-ah Kane-a'n Uruguayan midfielder Rodrigo Bentancur through ball ṭha zet chu goal-ah a chantir a, Spurs 2-0 in an chak. England captain hian Premier League-a khualmuala goal khung tam ber record a siam a, league bikah goal 178 a khung tawh bawk. Kane hian player pali Alan Shearer (260), Wayne Rooney (208), Andrew Cole (187) leh Sergio Aguero (184) te chiah a tluk tawh lo.

Spurs manager Antonio Conte chuan, "Season ṭantirhah khan goal khung a harsat a, tunah erawh chance a nei dawn tih a hria. Chance ṭhahnem tak a nei ṭhin hi ka lawmpui a, hetiang striker ṭha kan kawl hian team a tichak a ni. A career chhungin nomawi chawi ngei a phu" tiin Kane a chungchang

a sawi.

Tottenham hian March 20, Pathianni hian West Ham an mikhual dawn a, London club pahnih hian Champions League khelh beiseina an neih ve ve avangin tunkar tawp inkhel tur hi a pawimawh ang.

Seagulls erawh match ruk chhung an chak lo zawn tawh a, match rukah hian goal khat chiah an khung bawk. Brighton hi season ṭantirh lamah che ṭha mah se tunah erawh point 33 hmuin 13-naah an awm mek.