Chhinga Veng leh Aizawl FC an inhnehtawk
Mc Dowell's No. 1 Soda Mizoram Premier League Season 7 'league round' match hnuhnung berah champion lai Chhinga Veng leh vawi hnih champion tawh Aizawl FC te 1-1 in an inhnehtawk.
Thawhṭanni zan khan round 11 khelh hmabak chu khelh zawh a ni a, I League club tan Lalruatfela Zote chuan tauh lutin Chhingcows-in Gatch Arthure Diomande goal ropui hmangin an sut a, AFC captain Lalhriatrenga (Achia) chu man of the match a thlan a ni.
Inenchhinna
Aizawl FC-in Inrinni hian East Bengal an mikhual dawn a, ni li chawlhna hun an neih dawn avangin MPL match hnuhnung ber hi I League atan 'practice match' atan an hmangah a ngaih theih.
Gift Raikhan chuan bul ṭantu zingah I League-ah pawh a chhawr rim Lalrinfela hmangin bench-ah Alfred Kemah Jaryan leh Ghanefo Ansumana Kromah-te a dah a. Defender pali Joe Zoherliana, Lalrinchhana Tochhawng, Achia leh V. Lalchhuanawma te tan coach rilru hmin theihna hun ṭha a ni a, goal nawrtu Lalkhawpuimawia, Fela Zote leh Lalremsanga-te tan pawh hun ṭha a ni.
Chhinga Veng pawhin player inenchhin nan an hmang ve tho a, keeper ṭha Zothanmawia'n ho mah se player ṭha ṭhenkhat awltir an ni a, inhliam vanga season hmang ṭha tawk lo Lalremruata leh Lalmalsawma-te tan semifinal hmaa pressure nei loa inkhel an hmachhawn hi an tan insiamṭhatna hun a ni.
Passing game
Inkhel result-in table-ah nghawng a nei dawn tawh lo a, hlauhthawnna nei loin Aizawl FC-in passing game nen bul an ṭan a, hmuhnawm viau mah se Gift Raikhan-a naute khelh dan a ṭha famkim lo, a chhan chu goal hmaah tak an hlauhawm pha lo.
Chhinga Veng FC-in ball an chang tlem a, amaherawh-chu AFC-in goal attempt vawi hnih an neih laiin vawi sarih an nei thei tlati. First half-ah team pahnih an inchhaih tawn a, goal hmuh tur a awm lo.
A dang ta
Second half ṭan aṭanga minute lina lekah V. Lalchhuanawma cross chu Fela Zote-in a tauh lut a, Aizawl FC-in hma an an hruai tak avangin inkhel a nung sawt.
Coach Lalsangzuala Hmar hnuaiah Chhinga Vengin tun season-ah Mizoram Police chauh an hneh lo a, MFA Super Cup leh I Day Football champion hian tlawm nawn an tum lo. Bench aṭangin defender ṭha PC Laldinpuia leh Hmingthanmawia te an luhtir a, goal khung turin foreigner Gatch an luhtir bawk.
Aizawl FC pawhin an foreigner pahnih Alfred leh Kromah te an luhtir a, inkhel kalhmang a dang. Foreigner pathum zingah hming langsar lo ber Chhingcows forward Gatch-a'n hming a chher ta ber a, minute 72-naah box pawn aṭangin kawh pawtin goal kilah tak a pet goal. Team pahnihin tlawm zawk nih an hreh a, fimkhur taka an khelh avangin goal dang a luh belh lo.
Hmabak
Chhinga Vengin pakhatna dinhmun an hauh a, Inrinni zan hian palina Chanmari FC nen semi final-ah an inhmachhawn dawn.
Lalsangzuala Hmar hian Chhingcows a zawm hma hian CFC chu MPL-ah a champion pui a, Chhinga Veng champion pui tur hian season liam ta khan semifinal-ah Chanmari FC hi a hneh leh bawk.
Sanga hote hi chak zawk tura rinkai ni mah se Chanmarians-in coach thar Chawngthansanga hnuaiah harhtharna an chang a, eng pawh thleng thei a ni tawh.
Aizawl FC erawhin Mizo player nei ṭha ber tiha sawi theih Mizoram Police nen Thawhṭanni zanah semifinal first leg an khel dawn. Police hian player nei hrawl hle mah se 'team game' ṭha an la nei thei lo a, round 13-ah Aizawl FC kim lo an hneh lo.