Mary Kom-i'n semifinal lut

Women World Boxing Championship khelh mekah nimin khan MC Mary Kom chuan quarterfinal a paltlang a, a chhe berah pawh bronze medal a dawn tawh dawn avangin, he inelna bikah hian a medal pasarihna a hlawh chhuak ngei dawn a ni.

Nimina flyweight (48kg) category quarterfinal inhnekah Mary Kom hian Chinese boxer Wu Yu chu 5-0 (30-27, 29-28, 30-27, 29-28, 30-27) in a hneh a, kum 35 mi ni tawh mah se Manipur nu hi a la che rangin a hnek a la na tawk hle.

Fa pathum nei tawh Mary Kom hian Women World Boxing Cham-pionship-ah hian tun hmain gold medal panga bakah silver medal pakhat a la tawh a, medal pasarih a lak dawn tak avang hian, Katie Taylor nena record inṭawm an neih lai (6 titles) chu khumin he inelna bika mimal hlawhtling ber a ni dawn.

Manipuri boxer chuan, "Tun hmain Chinese boxer hi ka hmachhawn ve nual tawh a, tawh an khirh thei hle. Wu Yu nen hian kan intawn vawi khatna a ni a, a zawng zawng chuan ni lo mah se a hnek ṭhenkhat kha chu inven har tak a ni. Mahse, kan inbeih hnuah a kalphung ka hrethiam thuai a, hnehna ka chan theih phah a ni," tiin a sawi.

Olympic bronze medalist Kom hian Ninga-niah semifinal a khel zui dawn a, North Korean boxer Kim Hyang Mi nen an intawng leh dawn. Nikum Asian Championship khan player pahnih hi an intawng tawh a, India nula hian hnehna a chan avangin tun ṭumah hian final luh beiseina a nei sang hle.