Cleveland-ah James a kir dawn

LeBron James chuan nipui laia a chhuahsan Cleveland Cavaliers a tlawh dawn. Ningani zing dar 6:30 hian Quicken Loans Arena-ah Los Angeles Lakers jersey ha tawh James hi eng tiangin nge an lo dawnsawn dawn tih chu basketball ngainatute hriat châk a ni.

Kum 33 mi James hian 2016 khan an khaw team hi NBA champion a nih pui a, American star hi Cleveland khaw mipui chuan an ngaisangin an dahsang hle. Mahse, a hmangaih Cavs chhuahsanin Lakers a zawm a, auh elna thawm a ri chhuak a nih pawhin a mak lo ang.

James awm lai khan Cavs hian a zawnin NBA Finals vawi li an khel thei a, vawi thum chu Golden State Warriors ngam lo mah se 1964 hnua a vawi khat nan an champion leh miau avangin a sulhnu hi sawinep theih a ni lo.

NBA Most Valuable Player atana vawi li thlan tawh James awm loh hnuah Cleveland hian ngai an la awh leh thei lo, match 15 an khelh tawh zinga 13 ngawt an tlawm; ṭum hnih chiah hnehna an la chang tihna a ni, Atlanta Hawks leh Charlotte Hornets te chiah an la hneh!

LA Lakers erawh match kua hnehna chang tawhin ṭum sarih an chak lo thung a, Western Conference lamah pariatna an ni mek. Cavs hi Eastern Conference team 15 awm zinga a hniam ber an ni thung.