MFA-in Referee Development Course kalpui mek

All India Football Federation leh Mizoram Football Association buatsaih, Referee Development Course chu November 19 khan Rajiv Gandhi Stadium-ah ṭan a ni a, November 22 thleng a awh ang.

Referee 59 inziak lut zingah Lunglei atangin hmeichhe pahnih an tel.

He hun hawngtu MFA honorary secretary Lalnghinglova Hmar chuan, "Football hmasawnna a kal tluan dâwn chuan referee ṭha kan mamawh a, Mizo referee-te chu a taka (practical) ṭha tak tak awm mah se, exam-a kaisang zel tura an inzir peih tawk loh avangin national level-ah referee kan nei meuh lo," tiin ṭan la turin kal khawmte a fuih.

MFA Referee committee chairman C Vanlalmawia chuan MFA hian tun hma pawhin referee-te hmasawn nan development course hi a buatsaih fo tawh a, sum ṭhahnem tak a sen tawh thu leh kalpui zel an tum thu a sawi.

AIFF developement officer MFA-a awm Samson Ramengmawia chuan, "Tun thleng chuan theory an zir nasa a, FIFA Laws of the Game hriatna kawngah nasa takin a pui ang. Hmasawnna turin an hmaa course ṭha tak chhawp sak an ni a, Mizoram football-in hma a sawn theih nan an hman ṭangkai a ṭul a ni," tiin Vanglaini a hrilh.

AIFF aṭangin referee instructor pahnih - Rizwan Ul Haq leh Supriya Bhattacharya-te an lo kal a ni.