Miami aṭangin Man City-ah Aguero

World Cup zawh hnuah Sergio Aguero hi Argentina tan khel tura koh a la ni leh rih lo a, international match khelh a nih laiin chawlh a nei thei ṭhin. Aguero hian Miami-a chawlh a hmanna aṭangin Thawhṭanni khan Manchester City training ground a pan leh tawh.

Kum 30 mi Aguero hi Pep Guardiola kaihhruaina hnuaiah khawvela striker hriam berte zinga mi a ni a, Premier League season kal laiah match 12 a khelh aṭangin goal riat a khung.

EPL hmahruaitu Man City player ṭhenkhat chu ram tan khelh turin an fehchhuak mek a, Spanish manager vanneihna chu a player tawnhriat ngah tawh - David Silva, Fernandinho, Ilkay Gundogan leh Aymeric Laporte te an chhuah ve loh bakah Aguero pawh a kir hma.

Chutih rualin kar tawpa West Ham hmachhawn tur City player zingah Kevin De Bruyne leh Benjamin Mendy te chu hliam vangin an inkhel thei dawn lo a, midfielder Bernardo Silva chuan Portugal tana a fehchhuahna lamah hliam tenau a tuar bawk.