Zawlkhawpui mawi turin East Bengal

I League club hausa bera chhal ngam East Bengal chuan Ningani khian Aizawl FC nena league match khel turin Aizawl khawpui an rawn pan dawn a, Inrinniah Mizo club nen hian an intawng dawn.

East Bengal captain Lalrindika Ralte chuan, "Aizawl rawn pan hlan kan nghakhlel tawh takzet a, Mizo mipui hmaa inkhelh a châkawm a ni," tiin Aizawl pan tura an phur thu Vanglaini a hrilh a, nghakhlel takin Inrinni an thlir.

Aizawl FC aṭanga East Bengal pantu Lalramchullova chuan, "Mahni club hlui hmachhawn chu a phurawm a, Dante-a (R. Laldanmawia) leh Brandon (VL Remdika) hnenah pawh goal khung ngei turin ka hrilh a ni," tiin an phur tawh thu Vanglaini a hrilh ve bawk.

East Bengal-ah hian Mizo panga an awm mek a, Lalrozama Fanai, Lalramchullova, Brandon VL Remdika leh R. Laldanmawia chu Aizawl FC tana khel tawh vek niin Lalrindika Ralte erawh East Bengal legend a ni.

Hmasawnna

East Bengal-in tun season-ah Quess nen inremna an neih avangin season khatah vaibelchhe 40 vel hman tur an nei niin sawi a ni a, an player lakluh pawh an hrawl a, anmahni puala stadium sa turin ruahmanna an nei mek nia sawi a ni bawk!

Didika Ralte chuan, "Quess an awm ve tawh avangin kawng tinrengah hma kan sawn a, engkim hi professional taka tih vek an duh a ni ber mai. Season danga pressure na tak ṭhin pawh kha a awm tawh lo a, engkim hi a danglam a ni ber," tiin an club inthlak danglamna a sawi.

Season thara Indian Super League khelh tum East Bengal hi an squad pawh a chhah a, foreigner an neih pawh an hrawl hle. Tlarhnungah Borja Gomez leh Johnny Acosta an inkawp tir thei a, tlarhmaah Enrique Esqueda an la nei cheu.

East Bengal hian Senegalese midfielder Kassim Aidara an nei bawk a, Aizawl FC fan-ten 'The Magician' tia hminglem hial an lo pek tawh Mahmoud Al Amna erawh hliam vangin an la chhawr thei lo thung.

Fak loh rual loh

East Bengal-in heti taka squad an nei ṭha chungin Didika erawhin an

ṭhat dan ber a la nih loh thu a sawi. Kolkata club captain chuan, "Amna hi hliam vangin kan la chhawr thei lo a, kan ṭhat ber ṭum anga chhal ngam a la ni lo," a ti.

Kolkata club hi Al Amna tel lo pawhin an ṭha tawk tih erawh a chiang. Borja Gomez hi kum 30 mi chauh niin La Liga club Granada tana Spanish league sang ber season hnih lo khel tawh a ni a, Ukrainian Premier League thlenga a khelh tawh avangin a tawnhriat ringawt pawh chhawr tham a ni.

Johnny Acosta hi kum 35 mi ni mah se World Cup khelh zawh taka Costa Rica tana match zawng zawng khel kim vek thei kha a ni a, ram tana match 71 inlan tawh defender hi a chhe thei lo. Hming langsar lo ber Kassim Aidara hi Minerva Punjab aṭanga an lak a ni a, bul ṭan a la nei lo.

Kum 30 mi Enrique Esqueda hi Mexico tana vawi kua inlan tawh, season hmasa lawka Polish first division club Arka Gdynia tana la khel kha a ni a, I League match thumah goal thum a khung leh der tawh - AFC defender tan hna a siam em em ang tih a chiang.

Chhuanlam awm loin...

RG Stadium-ah phul lem hman a nih avangin natural grass-a khel ṭhin player-ten khelh harsa an ti ṭhin. Mahse, Lalrindika Ralte chuan chhuanlam atan hman an tum loh thu a sawi.

Lunglei tlangval chuan, "Kan hotute hian engkim a ṭha thei ang ber an duh a, mahse khelmual hi chhuanlama hman erawh an duh lo thung. Kan khelhna tur hmun apiang kan hman thiam an duh a, khelmual chu chhuanlamah kan hmang dawn lo," a ti!

East Bengal hian match thum an khelh tawhah vawi hnih hnehna changin vawi khat an tlawm a, match hnuhnung berah Chennai City chu 1-2 in an ngam lo. AFC-in East Bengal an mikhual hmaa an match hnuhnung berah Chennai City an hmachhawn ve bawk a, 1-2 thoin an tlawm.

Chennai City laka tlawm hlim ve ve team pahnih an intawng dawn a, an danglamna erawh Mizo club hian match nga khelh tawhah la chak miah loin table mawngphah an luah a, EB erawh match thum chiah la khel chungin palina an ni mek.

Ṭha leh ṭha lo!

Mizo club coach Gift Raikhan-a'n a foreigner neih ṭhat tawk loh chu chhuanlamah a hmang ṭhin a, club dang nena khaikhinin ram pawn player a nei ṭha tawk loah a inngai.

Lalrindika Ralte chuan, "Aizawl FC hi team ṭha tak an ni tih a chiang a, tum an châkawm lo. Rampawn player pawh an ṭha tawk lo a ni mai thei a, mahse Alfred Jaryan leh Bektur Talgat Uulu te hi an la inkawp fuh tir lo mai mai niin a lang.

"Tualchhung player pawh an nei ṭha. Bench-ah David Lalrinmuana an dah thei a nih chuan team chhia tia sawi chi an ni lo," a ti a, AFC chu chetsual theihna a nih thu a sawi.

Aizawl FC-in I League nomawi an chawi ṭumin Chullova, Danmawia leh Brandon te an nei vek a, Armed Veng tlangval Chullova chuan, "Zep lohah chuan kan champion ṭum ai chuan tuna an squad hi a pan zawk," tiin Mizo club chu an khelh lai aia an chhiat tawh thu a sawi.

Coach chauh pawh!

East Bengal-in sum an ngah a, coach atana an lakluh pawh Spanish coach tawnhriat ngah Alejandro Menéndez a ni - ani hi Sporting Gijon youth team leh Real Madrid youth team aṭanga a coaching career ṭantu a ni.

Chullova chuan, "Coach hrawn nuam tak a ni a, a hnuaia khelh a nuam hle. Coaching pek a thiam a, training a nuam a, a game plan a fing a, engkimah a ṭha a ni ber," tiin an coach a fak.

Mizoram Premier League chhul chhuak defender chuan, "Kan coach hi chu a duh dan ang takin player-te hian kan la khel chhuak thiam lo zawk a ni," tiin a fak hle.

Kum 52 mi manager hian Real Madrid B team, Celta Vigo, Racing Santander leh China League One club Guangdong Sunray Cave F.C te pawh lo enkawl tawh a ni a, season hmasa khan Spanish third division club Burgos CF a enkawl.