UEFA Nations League ; Van Dijk-a'n Netherlands semifinal hruai thleng

FIFA World Cup leh European Championships hnuhnung ber ve vea inpetling zo lo Netherlands chuan Thawhṭanni zan khan 2014 World Cup champion Germany chu an mualah 2-2 in an draw a, 2018 World Cup champion France lehpelin UEFA Nations League final round an lut.

Gelsenkirchen-a inkhelah mualneitu Die Mannschaft-in Timo Werner (9’) leh Leroy Sané (20’) hmangin inkhel thunun bawk mah se hun tawp lamah Netherlands rawn tho chhuakin Quincy Promes (85’) leh Virgil van Dijk (90+1’) te hmangin an sut.

Europe ramte tana inelna Nations League-ah hian Netherlands hian England, Portugal leh Switzerland te hnung an zui a, semfinal-a inhmachhawn tur hi Dublin-ah December 3, Thawhṭanni zan dar 7:00-ah pawh a ni dawn.

Beisei phak lo?

Netherlands 'golden generation' a pel tawh a, ṭhang thar beiseiawm tura ngaihte Europe club lianah an chet ṭhat loh avangin he ram hian football-a hming chher leh turin hun an nghah a ṭul niin a lang.

FIFA World Cup 2014-ah Robin van Persie, Arjen Robben leh Wesley Sneijder ten Oranje hi pathumna an nihpui a, hemi hma inelnaah pawh final hial thleng mah se an vanglai hun a ral ṭan tih erawh hmuh hmaih theih a ni lo.

Euro 2016-ah Netherlands an tling zo lo a, World Cup hnuhnung berah a danglam chuang lo. Nations League

ṭan a nih pawhin Europe ram ṭha pahnih France leh Germany te nen an awm kawp avangin relegate tura rinkai an ni a, semifinal beisei ngam chi a ni lo!

An insiam ṭha e

Netherlands-in an match hmasa berah France 2-1 in an hneh lo a, World champion laka an tlawm hi a mak lo. Ronald Koeman-a enkawl team hian an mualah Germany 3-0 in an sawp a, Joachim Low-a hote chetfuh loh kal tluang lai a nih avangin fak chiam an la har.

Amaherawhchu Netherlands hian kar liam ta Inrinni khan an mualah world champion France chu 2-0 in an hneh a, he resutl avang hian final round khelh theihna kawng a inhawng ta chiah a, relegate mai tur Germany laka point khat hmuh a tawk.

Zan danglam chu

FC Schalke khelmual Veltins Arena-ah Netherlands an lenglut a, an bu zawlah Germany-in an thiamzia an lantir. Joachim Low hote hian minute kuana lekah Werner-a volley goal hmangin hma an hruai a, minute 20-naah Sane-a'n goal hnihna a khung zui bawk.

Die Mannschaft-in minute 80 chhung inkhel an thunun a, an mikhual an kat kual a, amaherawhchu League A group danga England leh Swizertland ten comeback ropui an lantir tawh avangin Netherlands pawh an beidawng duh lo.

Minute 85-naah Quincy Promes chuan box pawn chiah aṭangin goal kilah tak a pet lut a, Netherlands-in beiseina thar an neih phah a, chutah chiah chuan captain Van Dijk chu mamawh chhanna a ni. Liverpool defender hian minute 90-naah class zetin chakna goal a volley lut a, Van Dijk hi hun tawp lamah hian Dutch forward a ni!

Pa rintlak Van Dijk

Netherlands-in final round an luh theih nan captain Van Dijk hming lam hmaih a thiang lo. Liverpool-in Dutch defender lakluh nana pound maktaduai 75 zet an sen avangin an inchhir dawn lo a, tun dinhmun tur hi hmu lawk se sum an seng har hretah an inngai zawk hial tawh ang. Ram tan pawh Van Dijk a vul zel a, tun dinhmun an thlen theihna chhan a ni.

Kum 27 mi Van Dijk hian Germany an hmachhawn hmasak zawk ṭumin goal hmahruai a khung a, goal chhuah loin 3-0 in an chak a, France an hneh ṭum pawhin goal an chhuah lo. Low-a hote nen an inhmachhawn hnuhnun zawkah hian goal chhuah mah se mangan hnuah chuan forward-ah dah a ni a, 'tactics sheet' khelmuala cham bang an lak fuhah PSV Eindhoven forward Luuk de Jong nen tlarhmaah an hming dah kawp a ni.

Netherlands coach Koeman chuan, "Dwight Lodeweges (assistant coach) hnen aṭangin lekha ka dawng a, eng nge inziak ka hre lo. Eng pawh chu nise Virgil-a'n goal a khung hi a lawmawm hle a ni," tiin inkhelh banah a sawi.

Thawnthu a dang ta

England legend Gary Lineker chuan, "Football hi game awlsam tak a ni a, mi 22 in minute 90 chhung ball an inchuh a, a tawpah chuan German an chak ziah," tiin Germany an vanneih ṭhin thu a sawi.

Amaherawhchu tunah chuan he thusawi lar tak hi a dik reng ta bik lo a, Germany leh Netherlands inkhelah pawh thawnthu her danglamin a awm tih a lang. Koeman chuan, "Hun kal tawhte thlir let ila, Germany-in hun tawp dawna chakna goal an khung kan hre tam hle. Tunah erawh chuan Germany tih theih hi Netherlands pawhin kan ti ve thei niin a lang," tiin an chungah vanneihnain thla a zar thu a sawi.