Srikanth a inhnukdawk ve leh

Badminton inelna pakhat, tun kar chhunga khelh tur Syed Modi Inter­national Tournament aṭangin Kidambi Srikanth chu hliam vangin a inhnuk­dawk. Srikanth hma hian hmeichhe player ṭha PV Sindhu pawh a lo inhnuk­dawk tawh bawk a ni.

Indian shuttler Sri­kanth chuan, "Syed Modi India Open-ah ka inlan thei dawn lo, ka inkhelh zawn rei tawh avangin ka taksa a chauh bakah hliam tenau ka nei, ti hian ka tan chuan season a tawp chhunzawm mai dawn niin a lang. Hun harsa ka tawh lai pawha min thlawp tlat tute chungah lawmthu ka sawi," tiin a sawi.

Srikanth inlan dawn lo mah se India hian cham­pion lai Sameer Verma a la nei tho a, Verma bakah hian nikuma Singapore Open champion B. Sai Praneeth chu seeded palina pek niin anni pahnih hi champion thei tura beiseiawm an ni ang.

Hmeichhe singles player Sindhu awm loh vangin Saina Nehwal chungah India mipuite beiseina a sang zual dawn, London Olympic bronze medalist hian kumin chhungin Badminton World Federation hnuaiah nomawi a la chawi lo a, kut ruaka season hman zawh ai chuan a theihtawp tak meuh a chhuah ang.