Real Kashmir ngamtu Bagan an kal zel
Mohun Bagan chuan nimin tlai khan Srinagar khaw vawtah Real Kashmir chu 1-0 in an hneh a, I League-ah hma an sawn zel.
Kolkata club hian league match hmasa pahnihah hnehna chang zo lo mah se match hnih chu a zawnin hnehna an chang leh ta a, league table-ah pathumnaah an invawrhkai.
Mohun Bagan tan Aser Pierrick Dipanda chuan goal khat a khung a, Kashmir club-in a chhanletna tur an neih theih loh avangin an mualah an tlawm.
Real Kashmir hian match li an khelh tawhah vawi khat chiah hnehna an la chan avangin pasarihnaah an awm mek a, Srinagar khaw vawt hmang remchang tura ngaih an nih laiin an home match an chhawr thei ṭhin lo.
Hmasawn tum Kashmir
Real Kashmir hi Jammu & Kashmir club an nih avangin ngaihven an hlawh a, an inkhel a nih tawh chuan Indian football ngainatuten Srinagar lam an hawi ṭhin.
Mahse, Srinagar club hian beisei ang result an chhawp chhuak thei ṭhin lo a, Bagan lakah hnehna chan ngei an tum - coach David Robertson chuan Neroca hneh lo aṭangin squad a siksawi.
Rangers defender ṭhin hian Nagen Tamang, Khalid Qayoom leh Abhash Thapa te la chhuakin an aiah Farhan Ganie, Brian Mascarenhas leh Muhammad Hammad a luhtir a, an ti thei viau.
Mohun Bagan coach Sankar Lal Chakraborty chuan rin loh takin Lalchhawnkima chu bench-ah a dah a, Mizo defender aiah hian Peerless SC aṭanga an lakluh Dalraj Singh chu inkhel bul ṭantir a ni.
Bagan an vannei
Starting XI ti danglam ve veah David Robertson-a'n thutlukna a siam fuh zawk a, Bagan aiin Real Kashmir an hlauhawm hmasa zawk.
Ivorian striker Gnohere Krizo chuan Chhawnkima thlaktu Dalraj chu mawi zeta a bum hnuah chance duhawm a nei a, mahse goalkeeper Shilton Paul a inrawlh hman.
Goal khung loin team pahnihin chawlhlawk an hmang a, Mohun Bagan an vanneih chhunzawm. Minute 60-naah Nagen Tamang chu penalty area-ah tih tluk a ni a, penalty hlawh chhuakah a inngai.
Mahse, referee-in ngaihdan dang a nei a, penalty spot a kawk tlat lo. Real Kashmir an lawm lo a, Bagan-in an vanneih zia an hai lo ang.
A goal ta!
Minute 70-na a ni a, Bagan-in goal an khung ta nge nge. Henry Kisekka hnen aṭanga a ball hmuh chu Aser Dipanda Dicka chuan Real Kashmir goal-ah a tauh lut a, chakna goal a ni zui.
Bagan tan kum 29 mi Dicka leh Kisekka te inkawp an hlauhawm a, Real Kashmir an rum ṭhaih tluan chhuak zak - an goal thawhchhuah erawh goal khat chiah a ni.
Kum 29 mi Dicka hian tun season-ah match li khelin goal thum a khung tling leh der tawh a, kum 29 mi tho Kisekka hian goal khat chiah la khung mah se a ṭangkaina erawh hmuh hmaih theih a ni lo.
Bagan tan Lalchhawnkima'n bench lamah hun a hmang tluan a, William Lalnunfela chu bench aṭanga luhtir a ni thung.
Vawiinah I League match inkhel a awm dawn lo a, naktuk tlai dar 5:00-ah Shillong Lajong chuan Minerva Punjab an mikhual ang.
Team P W D L GF GA GD Pts
1 Chennai City FC 5 4 1 0 13 7 6 13
2 Gokulam Kerala FC 5 2 2 1 8 6 2 8
3 Mohun Bagan 4 2 2 0 6 3 3 8
4 Quess East Bengal 3 2 0 1 6 3 3 6
5 Churchill Brothers FCG 4 1 3 0 6 4 2 6
6 NEROCA FC 4 1 2 1 3 3 0 5
7 Real Kashmir FC 4 1 1 2 1 3 -2 4
8 Minerva Punjab FC 4 1 1 2 2 3 -1 4
9 Indian Arrows 3 1 0 2 2 6 -4 3
10 Shillong Lajong FC 5 1 0 4 6 12 -6 3
11 Aizawl FC 5 0 2 3 5 8 -3 2