Dutch GP an tlan leh mai thei

Formula 1 neitu thar Liberty Media ten khawvel pumah car intlnasiakna sang ber hi a theihtawpa vawrh lar zual an tum mek a, nakkumah Thailand Grand Prix an tlan dawn tih a chian hnuah Dutch Grand Prix thawm a awm ve leh ta.

Tun hma chuan Dutch Grand Prix hi tlan a lo ni tawh ṭhin a, mahse kum 1985 hnulamah an tlan leh tawh lo. Amsterdam khawpui aṭanga mel 20 vela hlaah 2020 aṭangin F1 an tlan leh a nih pawhin a mak lo ang.

F1 commercial ma­­­na­ging director Sean Bratches chuan, "Kei­ni lam chuan kan beng­khawn hle, inbiak­na pawh a lawmawm lam zel a ni rih e," tiin Dutch GP chungchangah indawrna an kalpui mek ngei thu a sawi chhuak.

Tun dinhmunah Dutch hian driver cham­pion nei chiah lo mah se, Red Bull driver Max Verstappen an neih lai hi khawvela hmuhnawm leh beisei awm berte zinga mi a ni mek; Dutch mipui ten an khawtual tlangval intlansiak en tura - Austria, Hungary leh Belgium an pan nasat ṭhin avangin an ramah ngei a tlan thei a nih chuan mipui a hip dawn tih a chiang.

Kum 20 mi Verstap­pen hian season liam ta khan intlansiak vawi hnihah hnehna a chang a, car intlansiakna sang berah hian a pumpuiah vawi nga hnehna a chang tawh - Lewis Ha­milton leh Sebastian Vettel te vanglai a liam ruala rawn par chhuak thei tura ngaih a ni.