Harsatnain a ngam loh Gunneswaran

Prajnesh Gunneswaran hming hi tennis ngaina tu zingah pawh a langsar lo a, mahse tunah chuan India mipa singles huanga chung­nung ber a ni ta. Khup hliam vanga harsatna hrang hrang a tawh hnua a thawh chhuah leh dan hi tunlai India ram tennis huang bika chanchin sawi hlawh a ni mek.

Kum 2007 khan Gunneswaran hian ramchhung inelna sang National Games-ah final a lut a, media ten an ngaiven hman hle. Mahse, beiseina nen hma­lam hun a thlir laiin a khup a hliam a, 2010-2012 chhung kan tournament paruk chiah a khel thei - a dam hnuah pawh harsatna dang a neih zui avangin 2014 thleng khan a inkhel thei lo zui.

Beisei anga a inkhelh theih tak lohah chuan 2015 khen tennis chawlhsan mai a tum, sumdawnna lama kal mai a duh zawk a ni. Amaherawhchu, a pu S.G. Prabhakaran chuan huaisen taka ding turin a fuih a, a hliam a dam chhoh hnuah kum hnih chhungin India number 1-ah a invawrh kai leh thei a ni.

Bengaluru Open champion Gunneswaran hi world ranking-ah pawh 110-na a ni mek a, India player langsar dang Yuki Bhambri (128) leh Ramkumar Ramanathan (130) te a khum der tawh.

Kum 28 mi Gunneswaran chuan, "Hetianga rang hian tun dinhmun hi ka thleng deuh thut ang tih hi ka ring phak bik lo, ka thil tum chu ni mah se beisei aia rangin a rawn thleng a ni.

"Ka ngaihdan chuan tun aia sang thleng turin theihna ka nei a, khawvel huap pawhin a ṭha zual 100 zinga tel ngei ka tum ruh hle. Tuna kan thlen chinah ka lawm a, chutih rualin a la tawk lo hle a ni," tiin a sawi.

Bengaluru Open nomawi a chawi theih nan khan khawvel huap pawha langsar Denis Shapovalov a hneh thei a, Davis Cup-ah India ramin China a hneh theih nan inkhel pawimawh takah Wu Yibing a ngam bawk a ni.

Gunneswaran chuan sawi zawmin, "Hliam vanga inkhelh theih loh reng kha a hrehawm hle, 2016 khan inelna chi hrang hrang 16 ngawt hmachhawn mah ila ka hlawhtling tam lem lo, mahse ka hliam ber a awm tawh loh avangin a nuam hle. 2017 a rawn herchhuah kha chuan hlauhthawnna nei loin ka inkhel thei tawh a, season hnih chhungin ka ban phak loh tura ngaih ka ban phak ta hial a ni," a ti.

India tlangval hi Chennai-a cheng a nih avangin a hun tam zawk chu India chhim lamah a hmang a, tennis season chawlh lai chuan hma a sawn lehzual beiseiin Germany-a tennis aca­de­my pakhat Waske Tennis academy-ah training a nei ṭhin.