Lakers leh Rockets chak chiang
Nimin zing NBA regular season inkhelah Los Angeles Lakers leh Houston Rockets ten an khingpui ve ve hnehin an chak a, team ṭha pahnih hi Zirtawpni zing dar 9:00-ah an inhmachhawn zui nghal ang.
Lakers tan nidang ang bawkin LeBron James a hmuhnawm leh a, a team hi San Antonio Spurs lakah 129-102 a hnehna chanpuiin Western Conference lamah hmahruaitu an
ni chhunzawm.
American star James hian point 36 a neih zinga 19 zet chu fourth quarter bika a neih a ni, team pahnih an inkhelh tawk viau laiin James-a'n minute thum chhungin 3-points chu a zawnin vawi thum a nei thei; team pahnih danglamna thlentu a ni leh chiang hle.
Lakers coach Frank Vogel chuan, "A duh ti turin zalenna a nei a, theihna a nei bawk," tiin January thla NBA Western Conference Player of the Month James chungchang a sawi, a lakah rinna a nghat ngam hle.
Inkhel dangah Houston Rockets tan player pawimawh Russell Westbrook leh Clint Capela te hliam vangin inlan thei lo mah se buaina tur a awm lo, star player James Harden-a'n point 40 ngawt a neih theih avangin Charlotte Hornets chu 125-110 in an hneh.
NBA Results
New Orleans Pelicans 108 - 120 Milwaukee Bucks
Houston Rockets 125 - 110 Charlotte Hornets
Denver Nuggets 127 - 99 Portland Trail Blazers
Los Angeles Lakers 129 - 102 San Antonio Spurs
Zirtawpni Inkhel Tur
New York Knicks 06:00 AM Orlando Magic
Chicago Bulls 06:30 AM New Orleans Pelicans
Milwaukee Bucks 06:30 AM Philadelphia 76ers
Portland Trail Blazers 08:30 AM San Antonio Spurs
Los Angeles Lakers 09:00 AM Houston Rockets