MSL-5; Semifinal Game 1 ; Champion BCA hmaah Mission Veng Vikings
Mizoram Super League champion lai Zarkawt BCA leh MSL-3 champion Mission Veng Vikings ten zanin dar 7:30 hian semifinal Game 1 an khel dawn a, player ṭha rual awmkhawmna inkhel tur hi tualchhung basketball ngainatu tan en hmaih phal chi a ni lo ang.
Tun season league round an intawn ṭumin Vikings hian 80-83 in hnehna an chang a, semifinal an luh theihna kawng pawimawh a ni. An inkhelh hmasak hian BCA erawh a thiam pali zinga tling chiang tawh chunga inlan an ni tih erawh hriat tel a ṭha ang, chiang taka lang chu 'an inhlau lo tawn' tih hi a ni.
Insiamṭhat a ngai
Tournament a nih tawh chuan khingpui laka chak loh a pawi a, eng dinhmuna ding tawh pawh ni se BCA hian Vikings an ngam lo kha an pawm dam lo. Zarkawt veng club coach Lalruatfela chuan, "League round-a kan hneh loh awmchhun an ni a, hneh ngei tumin kan ṭang lehzual ang. Ka nauten inrintawkna an nei sang lehzual tawh.
"Tihsual kan neih lai ṭhenkhat kan zir chhunzawm a, tunah chuan final lut ngei turin kan khel zui dawn a ni. Player inhliam leh khel thei lo tur an awm lo a, kan ṭhat dan berin kan khel ang," tiin Vanglaini a hrilh.
BCA lakah chak tawh mah se Vikings lam pawh inchhuang thei an awm rih lo, manager H. Lalhruaitluanga chuan, "Tun season kan hman chhoh dan thlir chuan rinkai zawk kan ni lo ngei mai, chutih rualin kan dinhmun a chhiat ber lai pawha min phatsan ngai lotu Mission Veng Vikings chhungkua kan nei.
"Kan khingpui tur hi player ṭha tamna an ni a, a malkhaia huphurh bik nei lo mah ila inkhel awlsam a ni dawn lo. Hnehna chang tur chuan a hautak dawn a, chutih rual chuan final luh tumin kan khel dawn a ni," a ti. Team phnihin final luh an tum, hmun ruak pakhat chauh a awm dawn thung.
Fapa tlanbo
Mizoram Super League en ṭhin zingah Lalrina Renthlei hre lo an awm kher lo ang, Mission Veng Vikings tana MSL nomawi a chawi hnuah Lalrina hian Zarkawt BCA a zawm a, season hmasa khan a club thar hi a champion pui zui leh nghal.
BCA hian state pawn player Sowkin Shetty nei mah se, season kal laiah chuan nikum lama an hlawhtlinpui tawh tualchhung player ṭhate chu an innghahna an ni mek. Khatla TBL laka Player of the Night ni thei Lalrina hi Vikings tan pawha ven ngun ngai bik tur a ni.
Tuikhuahtlang tlangval Lalrina chauh sawi theih a ni lo, BCA tan an intawn hmasak ṭuma point score hnem ber Zonunsanga (24 points) bakah Matthew Remtluanga Sailo leh Reuben Lalsangkima te an inkawp fuh leh a nih ngat chuan team dang tana dan theih loh tur khawpa ṭha an ni leh ang.
Dunk lalpa
Mizoram Super League season 3-ah khan Mission Veng Vikings hian hlauhthawnna nei miah loin nomawi an chawi, tia sawi theih a ni. An champion chhan langsar ber chu Ronald March an neih vang a ni - kuminah March thlak zo tura ngaih Dijon Najee Farr an nei a, tun thleng chuan an beisei ang erawh an la hmu lo niin a lang.
Amahaerawhchu, All Star Game khelh zanah Farr-a hian a thiam thil a lantir a, Dunk Contest bikah player ṭha dang khumin pakhatna a ni. Mission Veng tlangval Hruaia'n, "Mamawhna apiangah a hman theih," ti khawpa a fak tawh hi engtiang taka ṭha nge a nih chu zanin hian fiahin a awm ang.
BCA laka hnehna chang tur chuan Vikings coach Reuben Lalchhandama'n tun hma lama a hman thiam tawh Michal F. Lalawmpuia leh, tun hnai khel ṭha thei tak Lalhmachhuana te a chhawr thiam a pawimawh dawn a ni.