Player manto Neymar a inhliam

Paris St-Germain forward Neymar chu Brazil leh Cameroon ten friendly match an khelh ṭumin a inhliam a, Brazil forwad hi eng chena rei nge a chawlh dawn hriat la ni lo mah se team doctor chuan an rin aia a nat loh a beisei thu a sawi.

Nimin zing khan Milton Keynes-ah ram pahnihte hi an intawng a, minute ngana lekah Neymar hi a malpui tihrawl na vanga lakchhuah a ni. Barcelona forward hlui thlak tur hian Everton duhlai Richarlison dah luh a ni thung.

Toffees forward hian amah ringtu Tite beiseina a ti thlawn lo, chawlhlawk hma chiahin he inkhela goal awmchhun tauh lutin 1-0 in hnehna a chang. Manchester City striker Gabriel Jesus chuan second half-ah goal ban a pet per bakah, Arthur pawhin bar a tih per bawk - goal hnihna erawh an hlawh chhuak thei ta lo.

MK Stadium-a mipui 29,669 ten Neymar an lawm fal hle a, inkhel ṭan hma aṭangin amah au thawm a ring hle. Mahse, an beisei angin an hmu rei thei ta lo. Brazil team doctor Rodrigo Lasmar chuan, "Hatsatna a nei a, ngaiawh turin hun a mamawh. A hliam hi endik a ngai dawn a, a lan dan mai chuan hliam na tak a ni lo," tiin a sawi.

Neymar inhliam zanah Richarlison goal khat hmangin world champion vawi nga ni tawh an chak a, tun season Premier League player hmuhnawmte zinga tel phak chanchin sawiin Tite chuan, "Richarlison chet dan khan min barakhaih lem lo, a sir leh a laiah ṭha takin a khel thei tih ka chiang, khelmual chhung bakah training-na hmunah a theihna san zia ka hmu tawh a ni," a ti.