Champions League-ah VAR hmang mai thei

Season thar aṭanga Champions League leh Europa League-a hman ṭan tura tih, video assistant referee chu tun season aṭangin hman ṭan a ni mai thei.

European Club Association chairman Andrea Agnelli chuan, "Ruahman sa aia hma pawhin a tih theih tho a ni," a ti a, tun season-ah hman a nih dawn chuan knockout round aṭangin hman ṭan a ni ang.

UEFA president Aleksander Ceferin chuan, "UEFA refereeing chief Roberto Rosetti hoin hmalakna neih mek a ni a, technical lama tih ngai awmte pawh sawi vek an ni tawh.

"Kar leh lamah emaw chuan report kan hmuh theih tawh a beiseiawm a, a rei berah nakkumah chuan chiang takin hman a ni tawh ang," tiin a sawi.

ECA boss Agnelli chuan, "A rei berah nakkumah tih a ni a, chumi awmzia chu kuminah hman ṭan theih turin beiseina a awm tihna a ni," a ti.

VAR hi World Cup 2018-ah khan hman a ni tawh a, European top five league zingah Premier League chu la hmang lo awmchhun niin season tharah an hmang tawh dawn bawk.